पुणे : कोथरूड परिसरातील ‘एआरएआय’ टेकडीवर नशेत असलेल्या दोन युवतींचा व्हिडिओ समाज माध्यमावर प्रसारित करणाऱ्या अभिनेता रमेश परदेशी यांच्याविरुद्ध राज्य महिला आयोगाकडे तक्रार करण्यात आली आहे. याबाबत महिला आयोगाने चौकशी करून वस्तुस्थितीदर्शक अहवाल पाठवावा, असे पत्र कोथरूड पोलिसांना पाठवले आहे.

टेकडीवर शनिवारी (ता. २४) सायंकाळी दोन युवती बेधुंद अवस्थेत आढळून आल्या होत्या. तो व्हिडिओ परदेशी यांनी रविवारी समाज माध्यमावर प्रसारित केला होता. त्यात संबंधित युवतींचे चेहरे दिसून येत होते. दरम्यान, याबाबत मुंबईतील पत्रकार नेहा पुरव यांनी महाराष्ट्र राज्य महिला आयोगाकडे तक्रार केली आहे.

त्यावर आयोगाने या प्रकरणी योग्य ती नियमानुसार चौकशी करून कार्यवाही करावी, तसेच महिला आयोग कार्यालयास वस्तुस्थितीदर्शक अहवाल पाठवावा, असे पत्र कोथरूड पोलिसांना पाठवले आहे.