Pune Traffic News : गणेशखिंड रस्त्यावरील सेनापती बापट रस्ता व रेंजहिल्सकडे जाणाऱ्या वाहतूक व्यवस्थेमध्ये सोमवार (ता. ४) पासून बदल करण्यात आला आहे. प्रायोगिक तत्त्वावरील या बदलामुळे गणेशखिंड रस्त्यावरील वाहतूक प्रवाही होण्यास मदत झाली आहे.

सावित्रीबाई फुले पुणे विद्यापीठाकडून (आचार्य आनंदऋषीजी चौक) येणाऱ्या रस्त्यावर कॉसमॉस बॅंक ते शासकीय तंत्रनिकेतन महाविद्यालयापर्यंत रस्त्याचे काम सुरू असल्याने तेथे रस्ता अरुंद होऊन वाहतूक कोंडी होत आहे.

आचार्य आनंदऋषीजी चौकात महामेट्रो, बहुमजली उड्डाण पुलाचे काम सुरू असल्याने चौकात मोठ्या प्रमाणात वाहतूक कोंडी होत आहे. ही कोंडी फोडण्यासाठी चतुःश्रुंगी वाहतूक पोलिसांच्या शाखेने सावित्रीबाई फुले पुणे विद्यापीठ चौकातून सेनापती बापट रस्त्याकडे जाणारे ‘एसबी जंक्‍शन’ व शिवाजीनगरहून येऊन रेंजहिल्सकडे जाणाऱ्या वाहनांना ‘रेंजहिल्स कॉर्नर’ऐवजी, संबंधित दोन्ही रस्त्यांवरील वाहनांना कॉसमॉस बॅंकेसमोरून वळण्यासाठी (यू टर्न) व्यवस्था केली. सोमवारी सायंकाळपासून वाहतूक शाखेच्या पोलिसांनी या प्रायोगिक बदलाची अंमलबजावणी सुरू केली.

अरुंद रस्त्यामुळे वाहतुकीला ‘ब्रेक’

फिरोदिया बंगल्यापासून ते शासकीय तंत्रनिकेतन महाविद्यालय, ई-स्क्वेअरर्यंत रस्ता रुंदीकरणाचे काम सुरू आहे. परिणामी हा परिसरात रस्ता अरुंद झाला असून, सावित्रीबाई फुले पुणे विद्यापीठ चौकातून शिवाजीनगरकडे जाणाऱ्या वाहनांना या रस्त्यावर काही प्रमाणात ‘ब्रेक’ लागत असल्याची सद्यःस्थिती आहे. रहदारीच्या वेळी वाहतूक अक्षरशः संथ होऊ लागली आहे. बाणेर रस्त्यावरही रस्ता रुंदीकरणाचे काम सुरू असून, तेथेही रस्ता अरुंद झाल्याने वाहतूक संथ झाली आहे.

बफर रस्त्यावर असे आहे वेळेचे नियोजन

सावित्रीबाई फुले पुणे विद्यापीठ चौकातून बाणेर रस्त्याला पोलिस पेट्रोल पंपापर्यंत जाणाऱ्या वाहनांसाठी ‘बफर रस्ता’ अशी संकल्पना मांडण्यात आली आहे. त्यानुसार सकाळी सात ते दुपारी बारा या वेळेत वाहनचालकांना बाणेर रस्त्यावरून सावित्रीबाई फुले पुणे विद्यापीठ चौकापर्यंत येता येईल, तर दुपारी बारा ते सकाळी सात या वेळेत बाणेरकडे नियमितपणे वाहतूक सुरू राहणार आहे.

तसेच सकाळी सात ते दुपारी बारा या वेळेत सावित्रीबाई फुले पुणे विद्यापीठ चौकातून बाणेर रस्त्याकडे जाणाऱ्या वाहनांना पाषाण रस्त्यावरून अभिमानश्री चौक येथून बाणेर रस्त्याकडे जावे लागणार आहे.

गणेशखिंड रस्त्यावरील कॉसमॉस बॅंकेसमोरील रस्त्यावर सेनापती बापट रस्त्याकडे व रेंजहिल्सकडे जाणाऱ्या दोन्ही बाजूच्या वाहनांना जाण्यासाठी ‘यू टर्न’ केला आहे. त्यामुळे शिवाजीनगरकडून सावित्रीबाई फुले पुणे विद्यापीठ चौकाकडे जाणारी वाहतूक सुरळीत झाली आहे. फिरोदिया बंगला, कॉसमॉस बॅंक, एबीआयएल येथील रस्त्याचे काम पूर्ण झाल्यास येथील वाहतूकही सुरळीत होईल.
- शफील पठाण, वाहतूक पोलिस निरीक्षक, चतुःश्रुंगी विभाग

शिवाजीनगरहून सावित्रीबाई फुले पुणे विद्यापीठ चौकापर्यंत जाताना वाहतूक कोंडीमुळे एक तास वाया जात होता. आता मात्र वाहतूक काही प्रमाणात सुरळीत झाल्याने वाहतूक कोंडीपासून सध्या तरी आम्ही मुक्त झालो आहोत.
- अनामिक जाधव, संगणक अभियंता