पुणे, ता. १० : कसबा पेठेतील छोटा शेख सल्ला दर्ग्याच्या परिसरातील बेकायदा बांधकाम स्वत:हून काढून घेण्याचा निर्णय दर्ग्याच्या विश्वस्तांनी घेतला. त्यानुसार, शनिवारी रात्रीपासून बेकायदा बांधकाम काढून घेण्यास सुरवात करण्यात आली. या वेळी महापालिकेचे अधिकारी, कर्मचारी उपस्थित होते. याबरोबरच कडक पोलिस बंदोबस्तही ठेवण्यात आला होता.

कसबा पेठेतील पुण्येश्वर मंदिराजवळ छोटा शेख सल्ला दर्गा आहे. येथील बेकायदा बांधकाम काढण्याबाबत महापालिकेने नोटीस बजावल्यानंतरही विश्‍वस्तांनी त्यावर कारवाई केली नव्हती. दरम्यान, शुक्रवारी रात्री दर्ग्याच्या परिसरात महापालिका कारवाई करणार असल्याची अफवा पसरल्याने वातावरण तणावपूर्ण झाले होते. वरिष्ठ पोलिस अधिकाऱ्यांनी कारवाई होणार नसल्याचे सांगत जमावाला शांत केले. शनिवारी महापालिका आयुक्त विक्रम कुमार, पोलिस आयुक्त अमितेशकुमार, महापालिकेचे शहर अभियंता प्रशांत वाघमारे यांच्यासह दर्ग्याच्या विश्वस्तांची बैठक झाली. या बैठकीमध्ये बेकायदा बांधकाम स्वतःहून काढून घेण्याचा निर्णय विश्‍वस्तांनी जाहीर केला होता.

दरम्यान, विश्‍वस्तांनी शनिवारी रात्रीपासूनच स्वतःहून बेकायदा बांधकाम काढण्याच्या कामाला सुरवात केली. भिंती जाड असल्याने त्या काढण्यासाठी विलंब लागत होता. रविवारी दिवसभर तसेच रात्री देखील भिंती पाडण्याचे काम सुरु होते. बांधकाम काढताना कोणतीही अडचण येऊ नये, यासाठी महापालिकेने बांधकाम विभागाचे अधिकारी, कर्मचारी याठिकाणी ठेवले असल्याची माहिती महापालिकेच्या वरिष्ठ अधिकाऱ्यांनी दिली.