कसबा पेठेतील प्रार्थनास्थळाबाबत काही समाजकंटकांनी अफवा पसरविल्याने शुक्रवारी रात्री या भागात अचानक तणावाची परिस्थिती निर्माण झाली होती. त्यामुळे पोलिसांची कुमक मागविण्यात आली. या भागात कडेकोट पोलिस बंदोबस्त तैनात करण्यात आला. या वेळी जमावातील काहीजण ऐकण्याच्या मन:स्थितीत नव्हते. घटनेचे गांभीर्य ओळखून स्वतः: पोलिस आयुक्त अमितेश कुमार घटनास्थळी दाखल झाले. त्यांनी परिस्थितीचा आढावा घेत अधिकाऱ्यांना सूचना दिल्या. पोलिस सहआयुक्त प्रवीण पवार, अतिरिक्त आयुक्त अरविंद चावरिया, शैलेश बलकवडे, मनोज पाटील, प्रवीणकुमार पाटील, पोलिस उपायुक्त अमोल झेंडे, संदीपसिंग गिल, स्मार्तना पाटील, विक्रांत देशमुख, संभाजी कदम, रोहिदास पवार, हिंमत जाधव, सहायक आयुक्त सतीश गोवेकर, सुनील तांबे, रुक्मिणी गलांडे यांच्यासह इतर वरिष्ठ पोलिस अधिकारी रात्रभर घटनास्थळी ठाण मांडून होते. त्यांनी जमावाला अफवांवर विश्वास न ठेवण्याचे आवाहन करीत कौशल्याने परिस्थिती नियंत्रणात आणली. बघ्यांची गर्दी टाळण्यासाठी कुंभार वेस आणि पवळे चौकात बॅरिकेडस लावण्यात आले होते. काही सामाजिक संघटनांच्या प्रमुख पदाधिकाऱ्यांनीही जमावाला शांत करण्यात महत्त्वपूर्ण भूमिका बजावली. दुसऱ्या दिवशी शनिवारी पोलिस आयुक्तांनी प्रार्थनास्थळाचे विश्वस्त, संघटनांच्या पदाधिकाऱ्यांसमवेत बैठक घेतली. या बैठकीत विश्वस्तांनी सामंजस्याची भूमिका घेतली आणि अखेर तणाव निवळला.