शहरात वाहनांच्या तोडफोडीच्या घटना सुरूच

पुणे, ता. १० : शहरात वाहनांच्या तोडफोडीच्या घटना थांबत नसल्याचे दिसून येत आहे. हडपसर परिसरातील मांजरी बुद्रुकमध्ये गुंडांच्या टोळक्याने शनिवारी (ता. १०) मध्यरात्री दोघांना मारहाण करून वाहनांची तोडफोड केली.
या प्रकरणी ओमप्रकाश देशराज सिंग (वय २६, रा. केशवनगर, मुंढवा) यांनी हडपसर पोलिस ठाण्यात फिर्याद दिली. त्यावरून चार अनोळखी तरुणांविरुद्ध रविवारी गुन्हा दाखल करण्यात आला. पोलिसांनी दिलेल्या माहितीनुसार, ओमप्रकाश ऑर्डरची डिलिव्हरी देण्यासाठी मांजरी बुद्रूक येथील गवळी वस्तीत गेले होते. त्यावेळी आरोपींनी धारदार शस्त्राने ओमप्रकाश आणि त्यांचे सहकारी प्रथमेश परमेश्वर समुद्रे (वय १९, रा. झेड कॉर्नर, मांजरी) यांना मारहाण केली. गुंडांनी त्यांच्याकडील मोबाईल आणि रोख रक्कम हिसकावून घेतली. त्यानंतर दुचाकीचे नुकसान करण्यात आले. इतर वाहनांची तोडफोड करून परिसरात दहशत निर्माण करण्यात आली. याबाबत माहिती मिळाल्यानंतर सहाय्यक पोलिस आयुक्त जगदीश सातव, वरिष्ठ पोलिस निरीक्षक संतोष पांढरे, पोलिस निरीक्षक (गुन्हे) पंडित रेजितवाड, पोलिस उपनिरीक्षक महेश कवळे, डी. जी. सोनटक्के घटनास्थळी दाखल झाले. या प्रकरणी अद्याप कोणाला अटक करण्यात आलेली नाही.
-----