पुणे, ता. २९ ः सावित्रीबाई फुले पुणे विद्यापीठाच्या शैक्षणिक संकुलातील विविध विभागांची प्रवेश परीक्षा घेण्यात येणार आहे. मात्र, याचा गैरफायदा घेत काही खासगी संस्थांकडून विद्यार्थ्यांची फसवणूक करण्यात येते. याला आळा घालण्यासाठी विद्यापीठाच्या वतीने परिपत्रक प्रसिद्ध करण्यात आले आहे.

विद्यापीठाच्या शैक्षणिक प्रवेश विभागाचे उपकुलसचिव डॉ. मुंजाजी रासवे यांनी या संबंधीचे पत्रक प्रसिद्ध केले आहे. त्यात ते म्हणतात, ‘‘प्रवेश परीक्षेबाबत विद्यार्थी आणि पालकांनी संकेतस्थळावर किंवा प्रत्यक्ष विभागांत जाऊन माहिती घ्यावी. प्रवेश परीक्षेत सहभागी होण्यासाठी तसेच त्याची तयारी करण्यासाठी कोणत्याही व्यक्ती अथवा संस्थेला विद्यापीठाने प्राधिकृत केलेले नाही. विद्यापीठाच्या लिखित परवानगी शिवाय विद्यापीठाचे बोधचिन्ह तसेच माहिती परस्पर वापरू नये.’’ असे काही निदर्शनास आल्यास विद्यापीठाच्या प्रशासनाशी संपर्क करून खातरजमा करावी, असे आवाहनही करण्यात आले आहे.