पुणे, ता. ९ : लवादामध्ये देशात आणि जागतिक स्तरावर कायदेशीर करियरच्या सर्वोत्तम संधी निर्माण झाल्या आहेत. दिवाणी आणि फौजदारीसारख्या पारंपारिक कायदेशीर बाबींप्रमाणे लवादामध्ये करिअर निवडले पाहिजे, असे मत मुंबई उच्च न्यायालयाच्या माजी न्यायाधीश डॉ. शालिनी फणसाळकर यांनी व्यक्त केले.
‘हिंद लॉ हाऊस प्रकाशना’तर्फे लेखक आणि लवादाचे वकील अ‍ॅड. अमन विजय दत्ता लिखित ‘द हँडबुक ऑन डोमेस्टिक आर्बिट्रेशन इन इंडिया’ या पुस्तकाचे प्रकाशन लॉ कॉलेज येथील प्राचार्य पंडित सभागृहात न्यायाधीश डॉ. शालिनी फणसाळकर यांच्या हस्ते करण्यात आले. त्यावेळी प्रमुख पाहुणे म्हणून त्या बोलत होत्या.
जिल्हा सत्र न्यायालयाचे अतिरिक्त सत्र न्यायाधीश सुनील वेदपाठक, ज्येष्ठ सॉलिसिटर आणि मध्यस्थ अमित हरियानी, मुंबई उच्च न्यायालयाचे ज्येष्ठ वकील निखिल साखरदंडे, सिंगापूर आंतरराष्ट्रीय लवाद केंद्राचे माजी उपनिबंधक अ‍ॅड. गणेश चंद्रू आणि हिंद लॉ हाऊसचे रमेश सेठी यावेळी उपस्थित होते.
न्यायाधीश वेदपाठक म्हणाले, ‘‘हे पुस्तक लवादाच्या कायद्याचे सर्वसमावेशक विहंगमावलोकन देते. सध्याच्या आणि भविष्यातील न्यायालयीन कामकाजातही ते मदत करेल.’’ अधिवक्ता परवाझ काझी व रमेश सेठी यांनी सूत्रसंचालन व आभार मानले.