पुणे, ता. १० : महाविकास आघाडीचे उमेदवार रवींद्र धंगेकर यांच्या नावाचे विनापरवाना फलक लावणे आणि महिलांना साड्या वाटप केल्याच्या तक्रारीवरून पोलिसांनी कार्यक्रमाच्या आयोजकाविरुद्ध आचारसंहिता भंगाचा गुन्हा दाखल केला आहे.
पोलिसांनी दिलेल्या माहितीनुसार, पर्वती परिसरात एका प्रतिष्ठानच्या माध्यमातून धार्मिक कार्यक्रमाचे आयोजन करण्यात आले होते. तेथे धंगेकर यांच्या नावाचे विनापरवाना फलक लावले होते. काही महिलांना साड्यांचे वाटप करण्यात आले, अशी तक्रार भाजपच्या महिला कार्यकर्त्याने जिल्हाधिकारी यांच्याकडे केली होती. भरारी पथकाने पाहणी केली असता साड्या वाटप झाल्याचे आढळले नाही. परंतु काही महिलांकडे साड्यांच्या पिशवीवर धंगेकर यांचे छायाचित्र असल्याचे आढळून आले. भरारी पथकाकडून पर्वती पोलिस ठाण्यात देण्यात आली. त्यावरून गुन्हा दाखल झाला आहे, अशी माहिती वरिष्ठ पोलिस निरीक्षक नंदकुमार गायकवाड यांनी दिली.
दरम्यान, या प्रकरणाशी आपला संबंध नाही. भाजपच्या सांगण्यावरून आयोजकाविरुद्ध खोटा गुन्हा दाखल करण्यात आला आहे, असे धंगेकर यांनी स्पष्ट केले.