पुणे, ता. १० : मतदार यादीतील नावावर डिलीट असा शिक्का मारला असल्यास करायच्या कार्यवाहीच्या माहितीबाबतचा चुकीचा संदेश व्हॉट्सअपद्वारे प्रसारित केल्याबद्दल एका व्यक्तीविरुद्ध गुन्हा दाखल करण्याची प्रक्रिया सुरू करण्यात आली आहे, अशी माहिती जिल्हा निवडणूक प्रशासनाने दिली आहे. असे चुकीचे संदेश, अफवा पसरविल्यास कारवाई करण्यात येईल, असा इशाराही प्रशासनाने दिला आहे.
मतदान यादीत नाव नसल्यास नमुना क्र.१७ चा अर्ज भरून आणि आपले मतदार ओळखपत्र दाखवून मतदान करता येणार असल्याचा दिशाभूल करणारा संदेश संबंधित व्यक्तीने व्हॉट्सअपद्वारे पसरविला आहे. अशा संदेशामुळे नागरिकांमध्ये संभ्रम निर्माण होत असून, नागरिक व प्रशासन अशा दोघांना विनाकारण त्रासाला सामारे जावे लागत आहे. या संदेशामुळे हडपसर येथील मतदार नोंदणी कार्यालयात नागरिकांनी चौकशीसाठी गर्दी केली होती. म्हणूनच प्रशासनाने कडक पावले उचलली आहेत. असे संदेश जिल्ह्यात पसरविले जात असल्याचे निदर्शनास आले असून, अशा दिशाभूल करणाऱ्या संदेशांपासून सावध राहावे, अफवांवर विश्वास ठेवू नये, तसेच असे संदेश पुढे पाठवू नयेत, असे आवाहनही प्रशासनाने केले आहे.