Pune News : संगीतसूर्य मास्टर दीनानाथ मंगेशकर यांच्या गीतांवर आधारित ‘सूरां मी वंदिले’ हा आगळावेगळा कार्यक्रम सकाळ माध्यम समूहातर्फे आयोजित करण्यात आला आहे. या निमित्ताने पुणेकरांना स्वराधीश डॉ. भरत बलवल्ली आणि विदुषी मंजुषा पाटील या दोन प्रतिभावंत गायकांना ऐकण्याची संधी मिळणार आहे.

वीर सेनानी फाउंडेशन आणि स्वरनिनाद फाउंडेशनच्या सहकार्याने हा २५ मे या दिवशी सायंकाळी ६.३० वाजता कोथरूडमधील यशवंतराव चव्हाण नाट्यगृहात ही सुरेल मैफील रंगणार आहे. यासाठी प्रवेश विनामूल्य असून प्रवेशिका मात्र आवश्यक आहेत. यशवंतराव चव्हाण नाट्यगृह, बालगंधर्व रंगमंदिर यांसह बुधवार पेठेतील ‘सकाळ’च्या मुख्य कार्यालयात प्रवेशिका लवकरच उपलब्ध होतील.

ही मैफील संगीतसूर्य मास्टर दीनानाथ मंगेशकर यांच्या प्रगल्भ शास्त्रीय गायकी, नाट्यगीते आणि दुर्मीळ बंदिशीवर आधारित आहे. या रचनांसह मास्टर दीनानाथ यांचे दुर्मीळ नाट्यप्रवेशही मैफिली दरम्यान दाखविले जाणार आहेत. दिवंगत गायक उस्ताद राशिद खाँ यांच्यासह पं. सुरेश वाडकर, अशोक पत्की, हरिहरन, पं. रोणू मुजुमदार आदी दिग्गजांच्या चित्रफितींचाही या कार्यक्रमात समावेश असेल.

पं. बलवल्ली आणि मंजुषा सर्व रचना सादर करणार असून त्यांना तबल्यावर रामकृष्ण करंबेळकर, पखावजवर दादा परब, ऑर्गनवर मकरंद कुंडले, संवादिनीवर अभिनय रवांदे हे कलाकार साथसंगत करणार आहेत. विघ्नेश जोशी हे निवदेन करणार आहेत.
पं. बलवल्ली हे शास्त्रीय आणि उपशास्त्रीय संगीत क्षेत्रातील आंतरराष्ट्रीय ख्यातीचे आघाडीचे प्रतिभावान गायक आहेत.

मास्टर दीनानाथ यांच्यासारखीच अत्यंत सुरेल, भावनाप्रधान आणि तितकीच आक्रमक गायनशैली असलेल्या पं. बलवल्ली यांना आजवर अनेक पुरस्कारांनी सन्मानित करण्यात आले आहे. मंजुषा या हिंदुस्थानी शास्त्रीय संगीतातील आघाडीच्या गायिका. देशातील बहुतांश प्रतिष्ठित राष्ट्रीय संगीत महोत्सवांसह इंग्लंड, अमेरिका, सिंगापूर आदी देशांमध्ये त्यांच्या मैफिली रंगल्या आहेत. तरी अधिकाधिक रसिकांनी या मैफिलीचा आस्वाद घ्यावा, असे आवाहन ‘सकाळ’ने केले आहे.