यंदाही मतदान करताना पहिला नंबर
पर्वती विधानसभा मतदारसंघातील स्वारगेटजवळील भैरवसिंह घोरपडे उद्यानाजवळील महर्षी अण्णासाहेब शिंदे प्रशालेतील खोली क्रमांक-९ मध्ये विठ्ठल मेहता (वय, ६४) यांनी यंदाही सर्वप्रथम मतदान केले. त्यासाठी ते सकाळी ६.३० वाजताच मतदान केंद्रावर पोहचले होते. त्यामुळे निवडणूक कर्मचाऱ्यांनी साक्षीदार म्हणून त्यांना बोलावून ईव्हीएम सील करून कागदपत्रांवर त्यांच्या स्वाक्षऱ्या घेतल्या. त्यानंतर त्यांनी मतदान केले. मेहता गेल्या ४० वर्षांपासून मतदान करतात. यंदाची त्यांची २६ वी निवडणूक. या पूर्वीच्या २५ निवडणुकांतही त्यांनी सर्वप्रथम मतदान केले. मेहता म्हणाले, ‘‘मतदानाचा हक्क प्रत्येकाने बजावलाच पाहिजे. म्हणून मी सर्वप्रथम मतदान केंद्रावर पोहचतो. तेथील अधिकारी व कर्मचाऱ्यांनाही माझी भूमिका सांगतो. त्यामुळे त्याचेही मला सहकार्य मिळते.’’
----------------------
केंद्रावर मतदारांची सेवा
महाराष्ट्र ब्लाइंड क्रिकेट असोसिएशनचे सहसचिव दिलीप शेलवंते यांनी महर्षीनगरमधील मॅकहेन्री शाळेत दिव्यांग, ज्येष्ठ नागरिक मतदारांची यंदा सामाजिक जबाबदारीच्या जाणिवेतून अभिनव सेवा केली. मतदान केंद्राच्या आवारात दिव्यांग, ज्येष्ठ नागरिक आल्यावर शेलवंते त्यांना मतदान खोलीपर्यंत घेऊन जात होते. त्यांनी सकाळी ८ ते दुपारी २ वाजेपर्यंत मतदारांची सेवा केली. शेलवंते म्हणाले, ‘‘मतदान केंद्रात मतदानाच्या १८ खोल्या होत्या. तेथे पोहचल्यावर खोली क्रमांक शोधायला नागरिकांचा वेळ जात होता. ज्येष्ठ नागरिक, दिव्यांग त्यांनाही अडचण येत होती. व्हिलचेअरवरून आलेल्यांनाही मदतीची गरज होती. हे बघून मी थांबलो आणि या मतदारांची सेवा केली.’’