पुणे, ता. १६ : शहरात गुरुवारी (ता. १६) सकाळपासून उन्हाचा भयंकर चटका जाणवत होता. मात्र, दुपारनंतर आकाश ढगाळ झाल्याने उन्हाच्या काहिलीपासून काही अंशी दिलासा मिळाला. संध्याकाळी शहराच्या मध्यवस्तीतील पेठांसह काही उपनगरांमध्ये पावसाच्या हलक्या सरींनी हजेरी लावली. शहर आणि परिसरात शुक्रवारीदेखील (ता. १७) सोसाट्याच्या वाऱ्यासह पावसाच्या सरी पडण्याची शक्यता हवामान खात्याने बुधवारी (ता. १५) वर्तविली होती.
शहरात गेल्या दोन दिवसांपासून उन्हाचा चटका पुन्हा वाढला आहे. शिवाजीनगर येथील वेधशाळेत गुरुवारी संध्याकाळी साडेपाच वाजेपर्यंत कमाल तापमानाचा पारा ३६.८ अंश सेल्सिअस नोंदवला गेला. शहरात सकाळपासून उन्हाचा भयंकर चटका जाणवत होता. आकाश अंशतः ढगाळ असल्याने उकाडादेखील वाढला होता. त्यामुळे सकाळपासूनच पुणेकरांचे पंखे, कुलर सुरु होते. दुपारनंतर वातावरणात अचानक बदल झाला. आकाश ढगांनी व्यापले. त्यामुळे उन्हाच्या चटक्यापासून पुणेकरांना दिलासा मिळाला. त्यानंतर मेघगर्जनेसह विजांचा कडकडाट करत पावसाला सुरुवात झाली. शिवाजीनगर येथील वेधशाळेत संध्याकाळी साडेपाच वाजेपर्यंत ३.४ मिलिमीटर पावसाची नोंद झाली. तर, लोहगाव येथे दोन मिलिमीटर पाऊस पडला.
शुक्रवारीही शहर व परिसरात पावसाची शक्यता वर्तविण्यात आली आहे. कमाल तापमान ३८ अंश सेल्सिअसपर्यंत नोंदवले जाणार असून, किमान तापमानाचा पारा २२ अंश सेल्सिअस नोंदवण्याची शक्यता आहे. शनिवारपासून (ता. १८) आकाश मुख्यतः निरभ्र होणार आहे. सध्या सुरु असलेल्या वादळी वाऱ्यासह पडणाऱ्या पावसाची शक्यताही कमी होणार असल्याने उन्हाचा चटका पुन्हा वाढेल, असा अंदाज हवामान खात्याने व्यक्त केला. रविवारपर्यंत (ता. १९) कमाल तापमानाचा पारा पुन्हा ३९ अंश सेल्सिअसपर्यंत उसळी मारेल, असे सांगण्यात आले.

जिल्ह्यात तापमान पुन्हा चाळीशीपार...
शहर परिसरातील बल्लाळवाडी येथे ४०.८, तळेगावमध्ये ४०.७, शिरूरमध्ये ४०.२, राजगुरुनगर येथे ४०.१ आणि खेडमध्ये ४० अंश सेल्सिअस तापमानाची नोंद झाली. शहरातील कोरेगाव पार्क येथे सर्वाधिक म्हणजे ३८.९ अंश सेल्सिअस तापमान नोंदवले गेले. लवासा येथे सर्वांत कमी ३५.१ अंश सेल्सिअसची नोंद झाली आहे.