मिळकतकरावरील
पालिकेच्या सवलतीचे
दहाच दिवस शिल्लक
पुणे, ता. २१ ः मिळकतकर भरून पाच ते १० टक्क्यांची सवलत घेण्यासाठी अवघे १० दिवस शिल्लक आहे. १ जून पासून ही सवलत बंद होणार आहे. त्यामुळे ज्या नागरिकांनी अद्याप निवासी मिळकतकर भरला नाही, त्यांनी त्वरित पैसे भरावेत असे आवाहन महापालिकेतर्फे करण्यात आले आहे. दरम्यान, मंगळवारी (ता. २१) सायंकाळपर्यंत महापालिकेकडे ६३२ कोटी ९१ लाख रुपये जमा झाले आहेत.
महापालिकेतर्फे दरवर्षी १ एप्रिल ते ३१ मे या दोन महिन्यात मिळकतकर भरणाऱ्या नागरिकांना सूट दिली जाते. ज्यांचा मिळकतकर २५ हजारांपेक्षा कमी आहे. त्यांना दहा टक्के, तर २५ हजारांपेक्षा जास्त कर असणाऱ्यांना पाच टक्के सवलत दिली जाते. या सवलतीमुळे अवघ्या दोन महिन्यात महापालिकेकडे एक हजार कोटींपेक्षा जास्त रक्कम वसूल होत असल्याने कर्मचाऱ्यांचे पगार, विकास कामे करण्यासाठी महापालिकेकडे मोठा निधी उपलब्ध होतो.
शहरात १४ लाख २२ हजार मिळकतींची संख्या असून, आत्तापर्यंत ३ लाख ९७ हजार ५१८ मिळकतधारकांनी ६३२ कोटी ९१ लाख रुपये कर भरला आहे. नागरिकांना पुढील १० दिवसात कर भरता यावा यासाठी महापालिकेचे सर्व नागरी सुविधा केंद्र शनिवारी आणि रविवारी सकाळी १० ते दुपारी ४ वाजेपर्यंत सुरू राहणार आहे असे मिळकतकर विभागाचे उपायुक्त माधव जगताप यांनी सांगितले.
मिळकतकर भरण्यामध्ये पुणेकरांनी ऑनलाइन पद्धतीला पसंती दिली आहे. ४५ हजार ४१७ जणांनी १८.९८ कोटी रुपये धनादेशाद्वारे भरले आहेत. ६८ हजार ४२२ जणांनी ६८.४० कोटी रुपये रोख स्वरूपात भरले आहेत. तर २ लाख ४० हजार ८४० जणांनी ऑनलाइन पद्धतीने ४१७.११ कोटी रुपये भरले आहेत.
-----