पुणे, ता. २३ ः ‘‘स्किझोफ्रेनिया आणि इतर मानसिक आजारांचा रुग्ण तसेच त्याचे कुटुंब, नातेवाईक आणि समाजावर दूरगामी परिणाम होतो. तो टाळण्यासाठी वेळीच उपचार तसेच समुपदेशन गरजेचे आहे. यासाठी आपण सर्वांनी सामाजिक जबाबदारी घेऊन त्यांना मदतीचा हात देण्यासाठी पुढाकार घेतला पाहिजे,’’ असे आवाहन मानसोपचार तज्ज्ञ डॉ. अमर शिंदे यांनी येथे केले.
मांजरी येथील जागृती पुनर्वसन केंद्रात स्किझोफ्रेनिक रुग्ण आणि त्यांच्या नातेवाइकांनी घेतलेल्या पुढाकारातून स्किझोफ्रेनिया आणि अन्य मानसिक आजारांबाबत विशेष मेळावा उत्साहात पार पडला. या वेळी डॉ. शिंदे यांनी स्किझोफ्रेनिया आजारातील भीती वाटणे, चिडचिड, संशय घेणे, एकटेपणा ही लक्षणे सांगत या गंभीर आजारावर रुग्णांवर औषधोपचार करणे, पालक व नातेवाईकांचे समुपदेशन करणे गरजेचे आहे, असे सांगितले.
याप्रसंगी जागृती पुनर्वसन केंद्राच्या संचालिका विजया शिंदे, डॉ. गीतांजली जाधव, डॉ. श्रुती गोडबोले, गेट वे किटी ग्रुपच्या सदस्या बिंदू अग्रवाल, पुष्पा हुंबे, शिल्पा पानसरे, जागृतीचे व्यवस्थापक निरंजन पंडित, डॉ. अमोल कोल्हे, डॉ. फैजल, डॉ. सिद्धेश कोळगे आदी उपस्थित होते. कार्यक्रमाचे सूत्रसंचालन समुपदेशक मोसमी यांनी केले.