पुणे, ता. १ ः राष्ट्रवादी काँग्रेस शरदचंद्र पवार पक्षाच्यावतीने शुक्रवारी कालिचरण महाराज यांच्याविरुद्ध आंदोलन करण्यात आले. या वेळी ‘पुरोगामी महाराष्ट्र हवा, कालीचरणला पळवून लावा’, ‘समाजाला धोका, कालीचरणला ठोका’ अशा घोषणा देण्यात आल्या.
कालिचरण महाराज यांनी महिलांविषयी आक्षेपार्ह वक्तव्य केले होते. त्याचा निषेध नोंदविण्यासाठी पक्षाच्यावतीने शुक्रवारी टिळक रस्त्यावरील अभिनव महाविद्यालयाजवळील चौकात आंदोलन करण्यात आले. पक्षाचे शहराध्यक्ष प्रशांत जगताप यांच्या नेतृत्वात झालेल्या आंदोलनात किशोर कांबळे, गणेश नलावडे, सारिका पारेख, अजिंक्‍य पालकर, रोहन पायगुडे, तनया साळुंके, पायल चव्हाण, श्रद्धा जाधव आदींनी भाग घेतला.
जगताप म्हणाले, ‘‘भोंदू बाबा कालीचरणने आपल्या माता भगिनींना केवळ उपभोग्य वस्तू असे म्हटले आहे. त्याने तमाम महिलांचा अपमान केला आहे. त्याचे वक्तव्य राजमाता जिजाऊ, क्रांतिज्योती सावित्रीबाई फुले, पुण्यश्‍लोक अहिल्यादेवी होळकर यांच्या पुरोगामी महाराष्ट्रात होणे अत्यंत दुर्दैवी आहे. महाराष्ट्रात असा विकृतपणा खपवून घेतला जाणार नाही.’’
---------------------------