पुणे, ता. १ ः डेक्कन क्वीन एक्स्प्रेसने ९४ वर्षे पूर्ण होऊन ९५ व्या वर्षात पदार्पण केले आहे. सर्वांच्या या लाडक्या दख्खनच्या राणीच्या ९५ वा वाढदिवस पुणे स्थानकावर उत्साहात साजरा करण्यात आला. या वेळी रेल्वे प्रवासी ग्रुपच्या अध्यक्ष हर्षा शहा यांच्यासह रेल्वेचे वरिष्ठ अधिकारी उपस्थित होते. मुंबईतील छत्रपती शिवाजी महाराज टर्मिनसवर फलाटाच्या लांबी वाढविण्याचे काम सुरु आहे. त्यामुळे रेल्वे प्रशासनाने ३६ तासांचा ब्लॉक घेतला. त्यामुळे मुंबईला जाणाऱ्या गाड्या रद्द करण्यात आल्या आहेत. यात डेक्कन क्वीनचाही समावेश होता. मात्र प्रवाशांच्या इच्छेसाठी पुणे रेल्वे स्थानकाच्या फलाट क्रमांक चार वर सकाळी ''डेक्कन क्वीन'' लावण्यात आली. गाडीच्या इंजिनसमोर केक कापून वाढदिवस जल्लोषात साजरा करण्यात आला. या वेळी विविध प्रकारचे फुगे, झेंडूच्या माळांची आकर्षक सजावट करण्यात आली होती. गाडीची वेळ होताच ती मुंबईकडे मार्गस्थ न होता पुन्हा यार्डच्या दिशेने नेण्यात आली. हर्षा शहा यांनी रेल्वे प्रशासनाचे आभार मानले. या वेळी पुणे विभागाचे जनसंपर्क अधिकारी रामपाल बडपग्गा यांच्यासह प्रवासी मोठ्या संख्येने उपस्थित होते.
-----