पुणे, ता. २ ः ठाणे आणि सीएसएमटी या स्थानकांवरील फलाटांची लांबी वाढविण्यासाठी ३१ मे ते दोन जून दरम्यान मध्य रेल्वेकडून ‘मेगा ब्लॉक’ घेण्यात आला. या तीन दिवसांत एसटी प्रशासनाने दिवसाला सुमारे २४० गाड्या सोडल्या. त्यातून दिवसाला सुमारे २५ हजार याप्रमाणे सुमारे ७५ हजार प्रवाशांची सोय झाली.
या कालावधीत पुण्याहून मुंबईला जाणाऱ्या रेल्वे गाड्या मोठ्या संख्येने रद्द करण्यात आल्या होत्या. अशावेळी एसटी प्रशासनाने मुंबईला जाणाऱ्या प्रवाशांना दिलासा देण्यासाठी नेहमीच्या गाड्यांसह अतिरिक्त गाड्याही सोडल्या. स्वारगेट, पुणे स्टेशन व वाकडेवाडी येथून या गाड्या सोडण्यात आल्या.
‘मेगा ब्लॉक’मुळे डेक्कन क्वीनसह अन्य महत्त्वाच्या गाड्या रद्द करण्यात आल्या. पुण्याहून मुंबईला जाणाऱ्या प्रवाशांची संख्या जास्त आहे. तीन दिवस रेल्वे गाड्या रद्द झाल्याने काहींनी मुंबईला जाणे टाळले, पण अनेकांना जाणे आवश्यक असल्याने त्यांची सोय एसटीमुळे झाली.
या काळात ट्रॅव्हल्स चालकांनी तिकिटाच्या दरात मोठ्या प्रमाणात वाढ केली. त्याचा फटका प्रवाशांना बसला. अशावेळी सामान्य प्रवाशांसाठी लालपरी धावून आली. पुण्याहून मुंबईला दिवसाला सुमारे १५ ते १६ हजार प्रवासी एसटीने मुंबईला जातात. या कालावधीत रेल्वेच्या नियमित प्रवाशांनीही एसटीने प्रवास केला. परिणामी एसटी प्रवाशांची संख्या वाढली.
------------
रेल्वेच्या ‘मेगा ब्लॉक’च्या काळात प्रवाशांची गैरसोय होऊ नये म्हणून एसटी प्रशासनाने मुंबईसाठी जादा एसटी गाड्या सोडल्या. याचा प्रवाशांना मोठा फायदा झाला.
- प्रमोद नेहूल, विभाग नियंत्रक, राज्य परिवहन महामंडळ, पुणे
-----