पुणे : राज्यातील शासकीय आणि खासगी औद्योगिक प्रशिक्षण संस्थेतील शिल्प कारागीर प्रशिक्षण योजनेअंतर्गत प्रवेशासाठी केंद्रीय ऑनलाइन प्रवेश प्रक्रिया सोमवारपासून(ता. ३) सुरू झाली आहे. या प्रवेश प्रक्रियेत विद्यार्थ्यांना ३० जूनपर्यंत अर्ज भरता येणार आहे. प्रवेशाची अंतिम गुणवत्ता यादी ७ जुलैला, तर पहिल्या फेरीतील निवड यादी १४ जुलैला जाहीर होणार आहे. राज्यातील आयटीआयमध्ये प्रवेश घेऊ इच्छिणाऱ्या सर्व विद्यार्थ्यांना प्रवेश प्रक्रियेबाबत मार्गदर्शन करण्यासाठी प्रत्येक शासकीय आणि खासगी आयटीआयमध्ये प्रवेश प्रक्रियेदरम्यान सकाळी दहा ते अकरा या वेळेत नि:शुल्क मार्गदर्शन सत्र आयोजित करण्यात आले आहे.

प्रवेश पद्धती, नियमावली, प्रवेशाच्या संकेतस्थळाबाबत तांत्रिक शंका असल्यास विद्यार्थ्यांनी नजीकच्या आयटीआयमध्ये संपर्क साधावा, असे आवाहन व्यवसाय शिक्षण व प्रशिक्षण संचालनालयाने केले आहे. आयटीआयमधील प्रवेशासाठी चार प्रवेश फेऱ्यांसह संस्थास्तरीय समुपदेशन फेरी आणि खासगी आयटीआयमधील प्रवेश फेरी होणार आहे. या प्रक्रियेत पहिल्या प्रवेश फेरीची निवड यादी १४ जुलैला जाहीर होणार आहे.

तर, दुसरी प्रवेश फेरी १५ जुलै ते २ ऑगस्ट दरम्यान, तिसरी प्रवेश फेरी २८ जुलै ते १४ ऑगस्ट आणि चौथी प्रवेश फेरी १० ऑगस्ट ते २४ ऑगस्ट दरम्यान होणार आहे. या प्रवेश फेऱ्या झाल्यानंतर संस्थास्तरीय समुपदेशन फेरी २६ ऑगस्टला सुरू होणार आहे.

आयटीआय प्रवेश प्रक्रियेचे वेळापत्रक

• ऑनलाइन प्रवेश अर्ज करणे, अर्जात दुरुस्ती करणे, प्रवेश अर्जाचे शुल्क जमा करणे : ३० जून

• अर्ज स्वीकृती केंद्रात (शासकीय किंवा खासगी आयटीआय) मूळ कागदपत्रांच्या तपासणीनंतर प्रवेश अर्ज निश्चित करणे : ५ जून ते १ जुलै

• पहिल्या प्रवेश फेरीसाठी व्यवसाय व संस्थानिहाय विकल्प आणि प्राधान्य सादर करणे : ५ जून ते २ जुलै

• प्राथमिक गुणवत्ता यादी प्रसिद्ध करणे : ४ जुलै

• गुणवत्ता यादीबाबत हरकती असल्यास नोंदविणे : ४ आणि ५ जुलै

• अंतिम गुणवत्ता यादी प्रसिद्ध करणे : ७ जुलै

• पहिल्या प्रवेश फेरीसाठी संस्था व व्यवसायनिहाय निवड यादी प्रसिद्ध करणे, विद्यार्थ्यांना एसएमएसद्वारे कळविणे : १४ जुलै

• पहिल्या फेरीत निवड झालेल्या विद्यार्थ्यांनी प्रवेश निश्चित करणे : १५ ते १९ जुलै

संकेतस्थळ

https://admission.dvet.gov.in

www.dvet.gov.in