पुणे, ता. ४ : प्रेमप्रकरणास कुटुंबीयांनी विरोध केल्याने एका तरुणाने प्रेयसीचा खून करून आत्महत्या केल्याची घटना उघडकीस आली. हडपसर येथील मांजरी बुद्रूक परिसरातील एका हॉटेलमध्ये हा प्रकार घडला.
मोनिका कैलास खंडारे (वय २४) असे खून झालेल्या तरुणीचे नाव आहे. तिचा बेडशीट आणि ओढणीने गळा आवळून खून केला. त्यानंतर प्रियकर आकाश अरुण खंडारे (वय ३०) याने गळफास घेऊन आत्महत्या केली. हा प्रकार १३ मे राजी घडला. याबाबत सहाय्यक पोलिस निरीक्षक उमेश रोकडे यांनी फिर्याद दिली. त्यावरून तीन जूनला हडपसर पोलिस ठाण्यात गुन्हा दाखल झाला.
मोनिका आणि आकाश दोघे मूळचे अकोला जिल्ह्यातील बाळापूर तालुक्यातील कसुरा गावातील रहिवासी आहेत. आकाश शेती करत होता; तर मोनिका नोकरी करत होती. त्यांच्या प्रेमप्रकरणाला विरोध होत असल्याने दोघेजण पुण्यात आले. मांजरी-मुंढवा रस्त्यावरील स्पॉट लाइट हॉटेलमध्ये वास्तव्यास होते. आकाशने मध्यरात्री मोनिकाचा गळा आवळून खून केला. त्यानंतर त्याने पंख्याला बेडशीटने गळफास घेतला. याबाबत हॉटेलमधील कर्मचाऱ्यांनी पोलिसांना माहिती दिली.