मुंबई, ता. ७ ः भाजपचे नेते व उच्च आणि तंत्रशिक्षणमंत्री चंद्रकांत पाटल यांनी बारामतीत येऊन ज्येष्ठ नेते शरद पवार यांच्याबद्दल केलेले वक्तव्य बारामतीकरांना आवडले नाही. त्यांचे ते वक्तव्य चुकीचेच होते. मी याआधीदेखील यावर बोललो होतो. तसेच बारामतीत मी कमी पडलो, हे निर्विवाद सत्य आहे. कुठे कमी पडलो हे लोकांशी बोलल्यावरच कळेल. विधानसभा निवडणुकीत त्या चुका टाळू, असे उपमुख्यमंत्री अजित पवार यांनी सांगितले.
मुस्लिम समाज आमच्यापासून दूर झाला. संविधान बदलण्याचा विरोधकांनी प्रचार केला, त्याला संबंधित घटकाने पाठिंबा दिला, असेही ते म्हणाले.
मुंबईत काल (ता. ६) राष्ट्रवादीच्या आमदारांची बैठक झाली. बैठकीनंतर झालेल्या पत्रकार परिषदेत पवार बोलत होते.
लोकसभा निवडणुकीच्या वेळी महायुतीच्या बैठकीत पाटील म्हणाले होते, की आम्हाला बारामतीत शरद पवारांना हरवायचे आहे. शरद पवार आणि त्यांचे राजकारण भाजपला संपवायचे आहे. पाटील यांच्या या वक्तव्याचे तीव्र पडसाद उमटले होते.
आतापर्यंतच्या राजकीय प्रवासात बारामतीकरांनी मोलाची साथ दिली. पण या वेळच्या निकालाने मात्र मी आश्चर्यकारक झालो. या अपयशासाठी कोणाला दोष देणार नाही. अपयश माझ्यामुळे आले. मीच कुठे तरी कमी पडलो असल्याची कबुली देत अजित पवारांनी या वेळी दिली.