पुणे, ता. ४ : मराठा आरक्षणासाठी लढा देणारे मनोज जरांगे पाटील शनिवारी (ता. ६) पुणे दौऱ्यावर येत आहेत. बाणेरमध्ये सकल मराठा समाज सहाय्यक समितीच्या कार्यालयाचे दुपारी ३ वाजता त्यांच्या हस्ते उद्‍घाटन होणार आहे.
शनिवारी सकाळी ११ वाजता निगडीत अखंड हरिनाम सप्ताहाला ते भेट देणार आहेत. त्यानंतर देहू गावात जाणार आहेत. तेथून दुपारी दोनच्या सुमारास ते बालेवाडीत पोचतील. बाणेरमध्ये तीन वाजता त्यांच्या हस्ते सकल मराठा समाजाच्या कार्यालयाचे उद्‍घाटन होईल. त्यानंतर कोथरूडमधील छत्रपती शिवाजी महाराजांच्या पुतळ्याला पुष्पहार अर्पण करून ते डेक्कन जिमखाना येथे संभाजी महाराजांच्या पुतळ्याला पुष्पहार अर्पण करतील. सायंकाळी ७. ३० वाजता ते लालमहाल येथे येणार असून त्यावेळी दौऱ्याचा समारोप होईल.