पुणे, ता. ४ : रेल्वे स्थानकाच्या आवारात वाहतुकीला अडथळा ठरणाऱ्या दुचाकी, कचरागाड्या, गर्दीच्या वेळी पीएमपी बसची होणारी वाहतूक यामुळे मेटाकुटीला आलेल्या रेल्वे प्रशासनाने गुरुवारी सायंकाळी अखेर कारवाईचा बडगा उगारला. लोहमार्ग पोलिसांनी लावलेल्या दुचाकींचा प्रवाशांना अडसर ठरत २५ वाहनांच्या टायरमधील हवा सोडण्यात आली. कचरा टाकणाऱ्या स्टॉलधारकांना दंड केला, तर सायंकाळी स्थानकाच्या आवारात दाखल होणाऱ्या पीएमपीच्या बसला ‘ब्रेक’ लावला आहे.

अनेक दिवसांपासून पुणे रेल्वे स्थानकाच्या आवारात प्रवाशांना ये-जा करणे अवघड झाले होते. स्थानकाच्या आवारातच बेशिस्तपणे वाहने लावणे आणि ‘ड्रॉप अँड गो’च्या जागेत वाहने थांबून ठेवणे आदी प्रकार सर्रासपणे घडत होते. यापूर्वीही वाहतुकीच्या प्रश्नी रेल्वे प्रशासनाने पोलिस आयुक्त व वाहतूक विभागाच्या पोलिस उपायुक्तांशी पत्रव्यवहार केला होता. मात्र, त्याची दखल घेण्यात आली नाही. अखेर गुरुवारी संध्याकाळी वरिष्ठ विभागीय वाणिज्य व्यवस्थापक डॉ. मिलिंद हिरवे यांनी कारवाईचा बडगा उगारला. पार्सलच्या ठेकेदाराला २० हजार रुपयांचा दंड केला.

प्रवाशांना स्थानकात येण्या-जाण्यासाठी अडथळा ठरणाऱ्या पोलिसांच्या वाहनांवर कारवाई केली आहे. प्रवाशांना चांगल्या सुविधा देण्यासाठी आम्ही कटिबद्ध आहोत. अशी कारवाई सातत्याने सुरूच राहील.
- डॉ. मिलिंद हिरवे,
वरिष्ठ विभागीय वाणिज्य व्यवस्थापक, पुणे