‘नीट युजी’चे प्रवेशपत्र उपलब्ध
पुणे, ता. २ : वैद्यकीय प्रवेशासाठीची राष्ट्रीय पात्रता परीक्षा अर्थात नीट युजीचे प्रवेशपत्र उपलब्ध झाले आहे. नॅशनल टेस्टिंग एजन्सीने गुरुवारी (ता. २) नोंदणीकृत उमेदवारांना Exams.nta.ac.in/NEET/ द्वारे त्यांचे प्रवेशपत्र डाऊनलोड करण्याची सुविधा उपलब्ध केली आहे. एनटीएतर्फे रविवारी (ता. ५) दुपारी दोन ते संध्याकाळी ५.२० या वेळेत परीक्षा घेतली जाणार आहे. भारताबाहेरील १४ शहरांसह देशभरातील ५५७ शहरांमध्ये ही परीक्षा होणार आहे. देशभरातून २४ लाखांहून अधिक उमेदवारांनी नीट युजी परीक्षेसाठी नोंदणी केली आहे.

‘सेट’ची प्राथमिक उत्तरतालिका प्रसिद्ध
पुणे, ता. ३ : राज्यस्तरीय प्राध्यापक पात्रता परीक्षा अर्थात सेट परीक्षेची प्राथमिक उत्तरतालिका प्रसिद्ध करण्यात आली आहे. सावित्रीबाई फुले पुणे विद्यापीठाच्या सेट परीक्षा विभागातर्फे महाराष्ट्र व गोव्यातील उमेदवारांसाठी ७ एप्रिल रोजी सेट परीक्षा घेण्यात आली होती. उमेदवारांना setexam.unipune.ac.in या अधिकृत संकेतस्थळावर उत्तरतालिका उपलब्ध आहे. उमेदवारांना येत्या गुरुवार (ता. ९) पर्यंत सूचना व तक्रारी सादर करता येणार आहेत. विद्यापीठातर्फे याबाबतचे परिपत्रक प्रसिद्ध करण्यात आले आहे. विद्यापीठातर्फे एकूण १७ शहरांतील २८९ परीक्षा केंद्रांवर ही परीक्षा घेण्यात आली. त्यानंतर आता परीक्षेच्या प्राथमिक उत्तरतालिकेबाबत तक्रारी स्वीकारण्यास सुरुवात करण्यात आली आहे. विद्यार्थ्यांनी काटेकोरपणे वाचून सर्व सूचनांचे पालन करावे. तसेच प्राथमिक उत्तरतालिकेबाबत काही सूचना किंवा तक्रारी असल्यास ऑनलाइन पद्धतीने आवश्यक त्या शुल्कासह अर्ज करावेत. अर्ज फक्त ऑनलाइन पद्धतीने जमा करावेत, अर्ज व्यक्तीशः किंवा टपालामार्फत स्वीकारले जाणार नाहीत, असे या परिपत्रकात म्हटले आहे.