पुणे, ता. ३० ः नारायणराव पेशवा यांचा खून ते पहिल्या आंग्ल मराठा युद्धाची सुरुवात असा सुमारे अडीच ते तीन वर्षांचा कालखंड अभ्यासपूर्ण पद्धतीने इतिहासप्रेमींपुढे सादर होणार आहे. डॉ. उदय कुलकर्णी यांच्या ‘राघोबा ः दी असॅसिनेशन ऑफ नारायणराव पेशवा’ या पुस्तकाचे रविवार एक सप्टेंबर रोजी प्रकाशन होणार आहे.
डॉ. कुलकर्णी यांच्या ऐतिहासिक लिखाणावरील हे आठवे इंग्रजी पुस्तक असून चार पुस्तकांचा मराठी अनुवाद झालेला आहे. या पुस्तकाच्या निर्मितीसाठी त्यांना १८ महिन्यांचा कालावधी लागला. नारायणराव पेशवा यांच्या खुनासंबंधीची बखर या पुस्तकात वाचायला मिळणार आहे. इंग्लंडमधील रॉयल ॲशियाटिकमधून त्यांनी या बखरीची प्रत मिळविली असून डॉ. कुलकर्णी यांनी ती इंग्रजीत अनुवादित केली आहे. या पुस्तकाचे आणखी एक वैशिष्ट्य म्हणजे यात शनिवारवाड्याचा १७९६ मधील नकाश आहे. खुनाच्या वेळी कोण कोठून शिरले, कोठून पळाले याचा उल्लेख त्यात आहे. नकाशावरील मोडी लिपिमधील मजकूरही वाचकांसाठी इंग्रजीत उपलब्ध केलेला आहे. डेक्कन कॉलेजमधून हा नकाशा त्‍यांनी मिळविला आहे. १७७२ पासूनचा घटनाक्रम यात आहे. एकूण ११ नकाशे आणि २६ चित्रांचाही समावेश पुस्तकात केलेला आहे.
रविवारी (१ सप्टेंबर) नवी पेठेतील एस. एम. जोशी सभागृहात सकाळी ११ वाजता पुस्तकाचे प्रकाशन ‘सकाळ’चे अध्यक्ष प्रतापराव पवार, गोखले इन्स्टिट्यूटच्या अर्थशास्त्र विभागाचे प्रा. प्रदीप आपटे, सोमय्या विद्यापीठातील इतिहासाचे सहयोगी प्राध्यापक गौरव गाडगीळ यांच्या उपस्थित होणार आहे. यावेळी होणाऱ्या चर्चासत्राचे संचलन अमित परांजपे करणार असून मंजिरी धामणकर सूत्रसंचालन करणार आहेत.

फोटो-------41775