पुणे, ता. १५ : शुक्रवार पेठेतील सेवा मित्रमंडळाने कारगिल विजयाच्या रौप्यमहोत्सवी वर्षानिमित्त ‘कथा प्रेरणेची- गौरवगाथा विजयाची’ हा जिवंत देखावा सादर केला आहे. गणेशोत्सवात मंडळातर्फे १० दिवस १० उपक्रम राबविण्यात येतात. या अंतर्गत भारतीय सैनिकांप्रति कृतज्ञता व्यक्त करण्यासाठी सैन्यदलातील पाच अधिकाऱ्यांची धान्यतुला करण्यात आली. यावेळी लेफ्टनंट जनरल (निवृत्त) राजेंद्र निंभोरकर आणि ज्येष्ठ इतिहास संशोधक पांडुरंग बलकवडे यांच्या हस्ते सैनिकांचा सन्मान करण्यात आला. उद्योजक सारंग पासकंटी, सामाजिक कार्यकर्ते आनंद सराफ, पराग ठाकूर, डॉ. मिलिंद भोई, शिरीष मोहिते, मंडळाचे अध्यक्ष पराग शिंदे, रोहन जाधव, वैभव वाघ, योगेश पासलकर, खजिनदार अमर लांडे आदी उपस्थित होते.
नायब सुभेदार विलास दामगुडे, रामधन मिरगे व दत्ता मोझर यांच्यासह बी. व्ही. गुरव, बजरंग निंबाळकर यांचा सन्मान आणि धान्यतुला करण्यात आली. आपले घर, लुई ब्रेल अपंग कल्याण संस्था, बचपन वर्ल्ड फोरम, संतुलन पाषाण, सेवाधाम या संस्थांना धान्य देण्यात आले. विक्रांत मोहिते यांनी सूत्रसंचालन केले.