‘सीबीआय’ने गोळीचे
स्पष्टीकरण दिलेले नाही
बचाव पक्षाचा युक्तिवाद, दाभोलकर हत्या प्रकरण

पुणे, ता. १४ ः महाराष्ट्र अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर यांच्यावर गोळीबार करणाऱ्या हल्लेखोरांनी पाठीमागून पिस्तुलातून गोळ्या झाडल्या असतील, तर एक गोळी भुवईतून घुसून डोक्याच्या मागे कशी गेली, याचे स्पष्टीकरण केंद्रीय गुन्हे अन्वेषण विभागाने (सीबीआय) दिलेले नाही. तसेच ‘सीबीआय’ने महत्त्वाचे पोलिस अधिकारी तपासलेले नाहीत, असा दावा बचाव पक्षाने न्यायालयात केला आहे.
विशेष न्यायाधीश पी. पी. जाधव यांच्या न्यायालयात डॉ. दाभोलकर हत्याप्रकरणाची सुनावणी सुरू आहे. त्यामध्ये बचाव पक्षाचे वकील ॲड. वीरेंद्र इचलकरंजीकर यांनी अंतिम युक्तिवाद केला. या प्रकरणातील आरोपी सचिन अंदुरे याला डॉ. दाभोलकर यांच्यावर गोळ्या झाडताना स्वतः पाहिलेले नाही, तसेच कळसकर याचे छायाचित्र वर्तमानपत्रात पाहिले होते, अशी साक्ष एका साक्षीदाराने दिली आहे. डॉ. दाभोलकरांवर गोळ्या झाडल्यानंतर पळून जाणाऱ्या हल्लेखोरांना पाहिल्याचा दावा करणाऱ्या साक्षीदाराच्या साक्षीतही तफावत दिसत आहे. त्यामुळेच ‘सीबीआय’ने आरोपींची ओळख परेड केलेली नाही, असा युक्तिवाद ॲड. इचलकरंजीकर यांनी केला. गुन्हा घडल्यानंतर ‘अंनिस’चे कार्यकर्ते आपल्याकडे आले होते, असेही एका साक्षीदाराने मान्य केले असल्याचे ॲड. इचलकरंजीकर यांनी सांगितले. मुख्य आरोपींकडे पिस्तूल सापडले नसल्याच्या मुद्याकडेही त्यांनी न्यायालयाचे लक्ष वेधले. दरम्यान या प्रकरणाची पुढील सुनावणी २६ व २७ मार्चला होणार आहे.