पुणे, ता. ९ : पार्सल देण्याच्या बहाण्याने सदनिकेत आलेल्या सोसायटीतील सुरक्षारक्षकाने तरुणीचा विनयभंग केला. कल्याणीनगर भागातील एका सोसायटीत हा प्रकार घडला. या प्रकरणी येरवडा पोलिसांनी सुरक्षारक्षकाला अटक केली आहे.
विक्रम लक्ष्मण वाघ (वय २५) असे अटक करण्यात आलेल्या सुरक्षा रक्षकाचे नाव आहे. याबाबत एका २८ वर्षीय तरुणीने येरवडा पोलिस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी तरुणी कल्याणीनगर भागातील एका सोसायटीत दहाव्या मजल्यावर राहायला आहे. तरुणीने ऑनलाइन पद्धतीने काही वस्तू मागविल्या होत्या. या वस्तू देण्याच्या बहाण्याने सुरक्षारक्षक विक्रम सदनिकेत शिरला. तरुणीकडे पाहून त्याने अश्लील वर्तन केले. तरुणीने याबाबत पोलिसांकडे तक्रार दिल्यानंतर गुन्हा दाखल करून त्याला अटक करण्यात आली.