पुणे, ता. १२ ः जागतिक ज्येष्ठ नागरिक छळ प्रतिबंध जनजागृती दिनानिमित्त शहरातील विविध संघांच्या सहभागाने शुक्रवारी (ता. १४) सायंकाळी ४ ते ६ दरम्यान विशेष कार्यक्रम नवी पेठेतील निवारा वृद्धाश्रम येथे होणार आहे. ज्यात ज्येष्ठ नागरिक संघ, फेस्कॉम, अॅस्कॉप, योग संस्थांचा सहभाग असेल, अशी माहिती ‘फेस्कॉम’चे अध्यक्ष अरुण रोडे यांनी पत्रकार परिषदेत मंगळवारी दिली.
ज्येष्ठ नागरिकांचे सरासरी आर्युमान वाढले असून ज्येष्ठ नागरिकांची संख्या सुमारे १२ टक्के आहे. संयुक्त राष्ट्रसंघाच्या अभ्यासानुसार २०५० मध्ये ज्येष्ठ नागरिकांची संख्या २५ टक्के होईल. त्यामुळे ‘ज्येष्ठ नागरिक’ हा समाजातील एक मोठा आणि महत्त्वपूर्ण घटक आहे. त्यासाठी जगात वेगवेगळया देशात ज्येष्ठांच्या कल्याणार्थ तसेच कौटुंबिक आणि सामाजिक सुरक्षतेसाठी विविध कायदे केले आहेत. संयुक्त राष्ट्रसंघाने १५ जून हा दिवस ‘जागतिक ज्येष्ठ नागरिक छळ प्रतिबंध जनजागृती दिन’ म्हणून जाहीर केला असून त्यानिमित्ताने हा कार्यक्रम होणार आहे. त्याच्या अध्यक्षस्थानी सावित्रीबाई फुले पुणे विद्यापीठाचे कुलगुरू डॉ. सुरेश गोसावी तर, प्रमुख पाहुणे म्हणून केंद्रीय सहकार राज्यमंत्री मुरलीधर मोहोळ आणि खासदार डॉ. मेधा कुलकर्णी, तसेच निवृत्त पोलिस आयुक्त जयंत उमराणीकर, समाज कल्याण विभागाचे सहाय्यक आयुक्त मल्लिकार्जुन हरसुरे आदी उपस्थित राहणार आहेत.