पुणे, ता. ११ : कौटुंबिक न्यायालयातील वकिलांची संघटना असलेल्या ‘द फॅमिली कोर्ट लॉयर्स असोसिएशन’ची वार्षिक निवडणूक जाहीर झाली आहे. २८ जून रोजी मतदान होणार असून, त्याच दिवशी सायंकाळी मतमोजणी होऊन निकाल जाहीर करण्यात येणार आहे.
निवडणुकीसाठी ३९८ जणांची प्रारूप मतदार यादी जाहीर करण्यात आली आहे. सर्वोच्च न्यायालयाच्या निर्देशानुसार ‘वन बार, वन व्होट’ घोषणापत्र सभासदांना द्यावे लागणार आहे. १५ जूनपर्यंत दुपारी १२ ते तीन या वेळेत हे डिक्लेरेशन स्वीकारण्यात येणार आहे. दुपारी चार वाजता अंतिम यादी जाहीर करण्यात येणार आहे. त्यावर १८ आणि १९ जूनला दुपारी १२ ते तीन या वेळेत हरकती घेता येणार आहेत. १९ जूनला दुपारी चार वाजता अंतिम यादी जाहीर होणार आहे. २० आणि २१ जूनला उमेदवारी दाखल करता येणार आहेत. २२ जून रोजी अर्जांची छाननी होणार असून, २४ ला दुपारी तीनपर्यंत उमेदवारी अर्ज मागे घेता येणार आहे. २४ जून रोजी दुपारी चार वाजता अंतिम यादी जाहीर करण्यात येणार आहे. २८ जूनला सकाळी १० ते दुपारी चार या वेळेत मतदान होणार आहे. मतदानानंतर मतमोजणी होऊन निकाल जाहीर करण्यात येणार आहे. ॲड. अमृता गुरव-देशमुख या निवडणूक निर्णय अधिकारी म्हणून काम पाहत आहेत.