पुणे, ता. ५ ः ‘‘जिल्हा परिषदेच्या शाळांतील २३५ विद्यार्थी इस्रो आणि नासा संस्थांच्या भेटीसाठी आंतरविद्यापीठ खगोलशास्त्र व खगोलभौतिकशास्त्र केंद्रात (आयुका) मुलाखती देणार आहेत. मात्र, त्यातील ७५ विद्यार्थ्यांची निवड केली जाईल. परंतु, इतर विद्यार्थ्यांनाही देशातील नामांकित वैज्ञानिक संस्थांना भेट देण्यासाठी पाठविले जाणार आहे. ज्यामध्ये आयसरसारखी संस्था, तसेच राष्ट्रपती भवनालाही भेट देण्यात येणार आहे,’’ अशी माहिती जिल्हा परिषदेचे मुख्य कार्यकारी अधिकारी गजानन पाटील यांनी सोमवारी दिली.
जिल्हा परिषदेत आयोजित पत्रकार परिषदेत ते बोलत होते. या उपक्रमासाठी दोन टप्प्यांत परीक्षा घेण्यात आली. आता आयुकाकडून मुलाखती घेऊन अंतिम ७५ विद्यार्थ्यांची निवड केली जाईल. यापैकी २५ विद्यार्थ्यांची नासासाठी आणि ५० विद्यार्थ्यांची ‘इस्रो’ भेटीसाठी निवड होईल.
पाटील म्हणाले, ‘‘विद्यार्थ्यांना नासाला पाठविण्यासाठी निवडप्रक्रिया झाल्यानंतर व्हिसा आणि पासपोर्टसाठी कागदपत्रे गोळा केली जातील. प्रशासनाकडून ही प्रक्रिया पूर्ण करून विद्यार्थ्यांना नासाला पाठविले जाईल. या उपक्रमासाठी साधारण अडीच कोटी रुपयांपर्यंत खर्च अपेक्षित आहे. पुणे जिल्हा परिषदेच्या ग्रामीण भागातील विद्यार्थ्यांमध्ये वैज्ञानिक दृष्टिकोन रुजविण्यासाठी सुरू करण्यात आलेल्या उपक्रमाची व्याप्ती वाढवण्यात आली आहे. अमेरिकेतील नासा आणि देशातील ‘इस्रो’ या अंतराळ संशोधन संस्थांच्या भेटीसाठी विद्यार्थ्यांची निवडप्रक्रिया अंतिम टप्प्यात असताना, निवड न झालेल्या उर्वरित विद्यार्थ्यांनाही देशातील नामांकित वैज्ञानिक संस्थांना भेट देण्याची संधी उपलब्ध करून दिली जाणार आहे. एकही गुणवंत विद्यार्थी संधीपासून वंचित राहू नये, हा आमचा प्रयत्न आहे.’’