पुणे, ता. ४ : सावित्रीबाई फुले पुणे विद्यापीठाच्या जयकर ज्ञानस्रोत केंद्रातर्फे ग्रंथ प्रदर्शन आयोजित केले आहे. हे प्रदर्शन बुधवारपर्यंत (ता. ६) सुरू राहणार आहे. या प्रदर्शनाचे उद्‌घाटन विद्यापीठाचे कुलगुरू डॉ. सुरेश गोसावी यांच्या हस्ते झाले.
प्रदर्शनाच्या उद्‌घाटनप्रसंगी डॉ. गोसावी यांनी ग्रंथप्रदर्शनातील प्रत्येक स्टॉलला प्रत्यक्ष भेट देऊन प्रदर्शनात उत्तम ग्रंथांचा समावेश असल्याचे नमूद केले. विद्यापीठातील सर्व विद्यार्थी, संशोधक, शिक्षक व शिक्षकेतर कर्मचारी यांनी प्रदर्शनाला भेट द्यावी, असे आवाहनही डॉ. गोसावी यांनी केले. या ग्रंथ प्रदर्शनामध्ये देशभरातील ४०हून अधिक ग्रंथविक्रेते आणि प्रकाशक सहभागी झाले असून, देश-विदेशात प्रकाशित झालेल्या विविध विषयांवरील वर्ष २०२२ नंतर प्रकाशित झालेल्या ग्रंथांचा समावेश आहे. विविध विषयांवरील ग्रंथ पाहण्याची आणि आपले ज्ञान समृद्ध करण्याची ही एक अनोखी संधी आहे. या संधीचा सर्व अभ्यासक, संशोधक, वाचकांनी लाभ घ्यावा, असे आवाहन जयकर ज्ञानस्रोत केंद्राचे संचालक डॉ. संजय देसले यांनी केले. हे प्रदर्शन बुधवारपर्यंत सकाळी दहा ते सायंकाळी पाच वाजेपर्यंत जयकर ज्ञानस्रोत केंद्राच्या वाचनकक्षामध्ये सर्वांसाठी खुले राहणार आहे.