पुणे, ता. ९ : भारतीय डाक विभागातर्फे आधुनिक सेवांच्या विस्ताराची माहिती नागरिकांपर्यंत पोहोचविण्यासाठी ६ ते १० ऑक्टोबरदरम्यान ‘राष्ट्रीय टपाल सप्ताह’ साजरा करण्यात येत आहे. ‘पोस्ट फॉर पीपल : लोकल सर्विस, ग्लोबल रीच’ या संकल्पनेवर आधारित या सप्ताहाच्या माध्यमातून डाक विभागाने आपले पारंपरिक स्वरूप बदलून आर्थिक आणि सामाजिक विकासातील एक महत्त्वाचा घटक म्हणून आपली भूमिका स्पष्ट केली आहे.
या सप्ताहादरम्यान दररोज विविध विषयांवर आधारित उपक्रम आयोजित केले जात आहेत. सहा ऑक्टोबरला ‘तंत्रज्ञानदिनी’ नवीन तंत्रज्ञान आणि डिजिटल सक्षमीकरणावर आधारित प्रश्नमंजूषा झाली. सात ऑक्टोबरला ‘आर्थिक समावेशन दिवस’ साजरा झाला, ज्यात सुकन्या ग्रामयोजना आणि ‘पीएलआय’ आणि ‘आरपीएलआय’साठी ग्रामीण, डोंगराळ व आदिवासी भागात शिबिरे घेण्यात आली. तसेच ‘डाक चौपाल’चे आयोजन केले होते. आठ ऑक्टोबरला टपाल तिकीट आणि नागरिक केंद्रित सेवादिनी ‘माझ्या आदर्श व्यक्तीस पत्र’ या विषयावर पत्रलेखन स्पर्धा घेण्यात आली. गुरुवारी (ता. ९) ‘जागतिक टपालदिनी’ ‘वोकल फॉर लोकल’ संकल्पनेवर आधारित ‘पोस्टॅथॉन वॉक’ आणि ‘एक पेड माँ के नाम’ या कार्यक्रमांतर्गत वृक्षारोपण मोहीम राबविण्यात आली. शुक्रवारी (ता. १०) ‘ग्राहक दिनानिमित्त’ ग्राहकांच्या प्रशंसापत्रांचे प्रदर्शन आणि पथनाट्य असणार आहे.