पुणे, ता. ९ : अनधिकृत फ्लेक्स, बॅनर लावल्याने महापालिका प्रशासनाने २७ गुन्हे दाखल केले आहेत. मात्र, हे गुन्हे दाखल करताना अनधिकृत फ्लेक्स लावणाऱ्या राजकीय पुढाऱ्यांवर गुन्हे दाखल झालेले नाहीत. महापालिका प्रशासन कारवाई करताना भेदभाव करत असल्याचे समोर आले आहे.
शहरातील चौक, रस्त्यांवरील विद्युत खांब, पथदिवे, सिग्नलचे खांब अशा सार्वजनिक ठिकाणी मोठ्या प्रमाणात अनधिकृत फ्लेक्स, बॅनर लावले जातात. वाढदिवस, सणांच्या शुभेच्छा, राजकीय व्यक्तींची निवड किंवा कार्यक्रमांच्या जाहिरातींसाठी लावल्या जातात. गेल्या काही दिवसांपासून इच्छुक उमेदवारांच्या फ्लेक्सचे प्रमाण वाढले आहे. यामुळे विद्रूपीकरण होत आहे, तसेच महापालिकेचे उत्पन्नही बुडत आहे. आगामी निवडणुका आणि दिवाळीच्या पार्श्वभूमीवर सर्वच पक्षांचे इच्छुक कार्यकर्ते फ्लेक्सबाजी करत आहेत. नागरिकांच्या तक्रारीनंतर आयुक्त नवल किशोर राम यांनी कठोर कारवाईचे आदेश दिले. अतिरिक्त आयुक्त स्वतः रस्त्यावर उतरले असून, अनधिकृत फ्लेक्सबाजांवर थेट गुन्हे दाखल करण्याचे निर्देश दिले आहेत.

व्यावसायिक, सामाजिक संस्थांना लक्ष्य
महापालिका प्रशासनाने ७१ जणांविरोधात पोलिस ठाण्यात तक्रार दिली आहे. त्यापैकी २७ जणांवर गुन्हे दाखल झाले आहेत. मात्र, यामध्ये एकही राजकीय फ्लेक्सवर कारवाई झालेली नाही. या कारवाईमध्ये व्यावसायिक, सामाजिक संस्था यांना लक्ष्य केले आहे. शहरात अनेक ठिकाणी राजकीय पुढाऱ्यांचे, लोकप्रतिनिधींचे, इच्छुक उमेदवारांचे फ्लेक्स लागले आहेत. पण त्यावर कारवाई करण्याकडे दुर्लक्ष होत आहे. आकाशचिन्ह विभाग, क्षेत्रीय कार्यालयांकडून राजकीय फ्लेक्सवर कारवाई केली जात नाही. त्यामुळे प्रशासनाच्या कारवाईवर प्रश्‍न उपस्थित होत आहे. दरम्यान, यासंदर्भात अतिरिक्त आयुक्त पृथ्वीराज बी.पी. यांच्याशी संपर्क साधला असता प्रतिसाद दिला नाही.