पुणे, ता. ९ : गिरीप्रेमी अॅडव्हेंचर फाउंडेशनतर्फे जागतिक महिला दिनानिमित्त शिवनेरी किल्ला आणि नाणेघाट ट्रेकचे आयोजन करण्यात आले होते. या उपक्रमामध्ये १०० हून अधिक महिलांनी सहभाग नोंदवला. विशेष म्हणजे, स. प. महाविद्यालयातील १० दृष्टिहीन विद्यार्थिनीही यामध्ये सहभागी झाल्या होत्या.

ट्रेकला पुण्यातून प्रारंभ करून महिलांनी प्रथम शिवनेरी किल्ल्याला भेट दिली. किल्ल्यावर शिवाई देवीचे दर्शन घेऊन ट्रेकला सुरुवात केली. सहभागी महिलांनी छत्रपती शिवाजी महाराजांच्या जन्मस्थळाला वंदन करून पोवाडे गायले. यावेळी, जुन्नर येथील महिला स्वयंसेवकांनी गडाची माहिती महिलांना दिली. त्यानंतर नाणेघाटच्या भेटीत गुहांमधील ब्राह्मी लिपीतील शिलालेख, सातवाहन राजाचे नाव तसेच नागनिकेच्या दानाबद्दल महिलांना माहिती देण्यात आली. या विशेष ट्रेकच्या यशस्वितेसाठी गिरीप्रेमी संस्थेच्या महिला गिर्यारोहकांनी व जुन्नर येथील इतिहास अभ्यासकांनी योगदान दिले.