पुणे, ता. १० ः कोंढव्यातील महापालिकेच्या तीन शाळा आठवीपर्यंतच आहेत. नववी-दहावीचे वर्ग नसल्यामुळे अनेक विद्यार्थ्यांच्या शिक्षणासाठी परवड होत आहे. नागरिकांनी वारंवार मागणी करूनही महापालिका प्रशासन दुर्लक्षच करीत आहे. विद्यार्थ्यांना पुढील शिक्षण घेणे अशक्य होत आहे. त्यामुळे त्यांची गळती होते.
संत गाडगे महाराज शाळा (११२ ब), अब्दुल कलाम आझाद शाळा (२०९ ब) व बापूसाहेब दरेकर शाळा (१७५ ब) अशा तीन शाळा आहेत. गाडगे महाराज शाळेत ४०, आझाद शाळेत १२० तर दरेकर शाळेत ४० असे एकूण २०० विद्यार्थी शिक्षण घेतात. कोंढवा, पिसोळी, टिळेकरनगर, उंड्री येथील गरीब कुटुंबे आणि वस्त्यांमधील विद्यार्थ्यांची संख्या जास्त आहे. या शाळांत आठवी झाल्यानंतर विद्यार्थ्यांना पुढील शिक्षणासाठी भवानी पेठेतील महापालिकेच्या शाळेत जावे लागते.
या शाळा सुरू झाल्यापासून अनेकदा नववी-दहावीपर्यंतचे वर्ग वाढविण्याची मागणी नागरिकांनी केली आहे. आम आदमी पक्षाच्या अल्पसंख्याक विभागाचे शहराध्यक्ष एम. अली सय्यद यांनी महापालिकेच्या शिक्षण विभागाकडे यासाठी पाठपुरावा केला आहे. ते म्हणाले, ‘‘गेल्या एका वर्षापासून मी अनेकदा पत्रव्यवहार केला आहे. यानंतरही महापालिकेकडून ठोस पावले उचलली जात नाहीत. त्यामुळे विद्यार्थ्यांचे शैक्षणिक नुकसान होत आहे.’’
---------
विद्यार्थी-पालकांची परवड
- गरीब व कष्टकरी कुटुंबातील विद्यार्थ्यांना पुढील शिक्षण घेण्यात अडचणी
- विद्यार्थिनींना पुढील शिक्षणासाठी पाठविण्यात पालकांमध्ये उदासीनता
- हलाखीच्या परिस्थितीमुळे प्रवासखर्च परवडत नसल्याने विद्यार्थी मागे पडतात
- परवडत नसूनही जादा शुल्क भरून मुलांना खासगी शाळेत टाकणे पालकांना भाग
- दहावीपर्यंत शिक्षण नसल्याने विविध प्रकारच्या अभ्यासक्रमांची संधी हुकणे
------------------
कोंढव्यातील शाळांमध्ये नववी-दहावीचे वर्ग सुरू करण्याचे प्रस्तावित आहे. मान्यता मिळाल्यानंतर हे वर्ग सुरु करू. मान्यतेस एक महिना किंवा त्यापेक्षा जास्त कालावधी लागू शकतो. जून महिन्यापासून हे वर्ग सुरू होण्याची शक्‍यता आहे.
- आशा उबाळे, शिक्षणाधिकारी, महापालिका
-----------