पुणे, ता. १२ : स्वारगेट येथील एसटी बस स्थानकाचा वीजपुरवठा मंगळवारी (ता. ११) रात्रभर सुरळीत सुरू होता. स्वतंत्र वीजजोडणी असलेल्या आगारात तांत्रिक बिघाडामुळे दोन फेज सुरू असले तरी हायमास्ट आणि कार्यालयांचा वीजपुरवठा सुरू होता, असा दावा ‘महावितरण’ने केला.
बस स्थानकात मंगळवारी रात्रभर वीज खंडित होती, अशा तक्रारी आल्या होत्या. त्यावर हे स्पष्टीकरण देण्यात आले. बस स्थानक व आगारासाठी स्वतंत्र उच्चदाबाची वीजजोडणी आहे. यातील बस स्थानकाचा वीजपुरवठा अखंडित व सुरळीत आहे. आगाराच्या जोडणीला वीजपुरवठा करणाऱ्या भूमिगत वीजवाहिनीत काल सायंकाळी बिघाड झाला. मात्र दोन फेजद्वारे आगारात कार्यालयीन व हायमास्ट दिव्यांचा वीजपुरवठा सुरू ठेवण्यात आला. बिघाड झालेली वीजवाहिनी उड्डाणपुलाखालील काँक्रीट रस्त्याखाली आहे. त्यामुळे आगाराला पर्यायी व्यवस्थेतून तीन फेज वीजपुरवठा उपलब्ध करून देण्यात येत आहे, असे स्पष्ट करण्यात आले.
-----