पुणे, ता. १७ ः ‘‘अथक परिश्रम, चिकाटी आणि वेगवेगळ्या आघाड्यांवर एकाचवेळी काम करण्याची कसब, असे उद्योजक होण्यासाठी आवश्यक असणारे गुण महिलांमध्ये उपजतच असतात; परंतु महिलांना योग्यवेळी संधी न मिळाल्यामुळे त्या उद्योग क्षेत्रात मागे राहतात. उद्योग क्षेत्रातील प्रमाण वाढण्यासाठी महिलांना योग्यवेळी प्रोत्साहन देणे गरजेचे आहे,’’ असे मत उद्योजिका सुप्रिया बडवे यांनी व्यक्त केले.

शुक्ल यजुर्वेदीय माध्यंदिन महाराष्ट्रीय ब्राह्मण मंडळाचा उपक्रम असलेल्या याज्ञवल्क्य उद्योजक विकास अभियानतर्फे (युवा) उद्योग क्षेत्रातील महिलांना पुरस्कार देऊन गौरवण्यात आले. हा कार्यक्रम टिळक रस्त्यावरील न्यू इंग्लिश स्कूलच्या गणेश सभागृहात पार पडला. या वेळी संस्थेचे कार्याध्यक्ष-विश्राम कुलकर्णी, कार्यवाह श्रीकांत जोशी, हर्षल लेले, प्रतिभा संगमनेरकर, स्वाती कुलकर्णी, कार्तिकी जोशी, मंजूषा वैद्य, अंजली दारव्हेकर, उपेंद्र केळकर, आशिष कुलकर्णी, सचिन पंडित, प्रशांत देशपांडे, अजय कुलकर्णी, मंदार महाजन आदी उपस्थित होते.
‘स्वयंसिद्धा पुरस्कार’ पुण्यातील गजानन एंटरप्राइजेसच्या संचालिका वैशाली धर्माधिकारी, ‘युवा उद्योजिका पुरस्कार’ आर्टिसन प्रिंट ॲण्ड पॅकच्या संचालिका सानिया वाळिंबे यांना प्रदान करण्यात आला. ‘युवा गौरव पुरस्कार’ पोलिस निरीक्षक प्रतिभा जोगळेकर यांना प्रदान करण्यात आला. युवा उपक्रमांतर्गत सावित्रीबाई नारायण जोशी स्मरणार्थ ‘स्वयंसिद्धा पुरस्कार’ आणि मनोरमा श्यामराव कुंभोजकर स्मरणार्थ ‘युवा उद्योजिका पुरस्कार’ दिला जातो; तर ‘युवा गौरव पुरस्कार’ हा युवा कार्यकारिणी पुरस्कृत आहे. सन्मानचिन्ह, मानपत्र असे पुरस्काराचे स्वरूप होते.