पुणे, ता. १८ ः पिस्तूल बाळगणाऱ्या अल्पवयीन मुलाला समर्थ पोलिसांनी ताब्यात घेतले. त्याच्याकडून देशी बनावटीचे एक पिस्तूल आणि दोन काडतुसे जप्त करण्यात आली. दारूवाला पूल परिसरात ही कारवाई करण्यात आली.
अल्पवयीनाकडे पिस्तूल असल्याची माहिती गस्त घालणाऱ्या समर्थ पोलिस ठाण्यातील तपास पथकाला मिळाली. त्यानंतर पोलिसांच्या पथकाने दारूवाला पूल परिसरात सापळा लावला. टिळक आयुर्वेद महाविद्यालयाजवळ असलेल्या नागझरी नाल्याजवळ अल्पवयीन थांबला होता. पोलिसांनी सापळा लावून त्याला ताब्यात घेतले. त्याची झडती घेण्यात आली. तेव्हा त्याच्याकडे पिस्तूल सापडले. पिस्तुलासह दोन काडतुसे जप्त करण्यात आली. त्याच्याविरुद्ध बेकायदा शस्त्र बाळगल्याप्रकरणी गुन्हा दाखल करण्यात आला आहे.