पुणे, ता. १८ : घरगुती गॅस सिलिंडरमधून दुसऱ्या लहान सिलिंडरमध्ये गॅस भरून त्याची विक्री करणाऱ्या तरुणाला काळेपडळ पोलिसांनी अटक केली. हडपसरमधील हांडेवाडी परिसरातून ८० सिलिंडरसह इतर मुद्देमाल जप्त केला आहे.

विक्रांत राजकुमार जाधव (वय २२, रा. ससाणेनगर, हडपसर) असे अटक केलेल्या संशयिताचे नाव आहे. पोलिसांनी दिलेल्या माहितीनुसार, हांडेवाडी रस्त्यावरील एका सोसायटीसमोरील पत्र्याच्या शेडमध्ये घरगुती गॅस सिलिंडरमधून दुसऱ्या लहान सिलिंडरमध्ये धोकादायक पद्धतीने गॅस भरण्यात येत असल्याची माहिती पोलिस अंमलदार अतुल पंधरकर यांना मिळाली. ही बाब त्यांनी वरिष्ठांना कळवली.
पोलिस उपायुक्त डॉ. राजकुमार शिंदे यांच्या मार्गदर्शनाखाली सहाय्यक आयुक्त धन्यकुमार गोडसे, काळेपडळ ठाण्याचे वरिष्ठ पोलिस निरीक्षक मानसिंग पाटील, पोलिस निरीक्षक (गुन्हे) अमर काळंगे, सहाय्यक निरीक्षक अमित शेटे, पोलिस अंमलदार प्रवीण काळभोर, अतुल पंधरकर, महादेव शिंदे, सद्दाम तांबोळी यांच्या पथकाने त्याठिकाणी मंगळवारी (ता. १८) दुपारी एक वाजण्याच्या सुमारास छापा टाकला.
-------