पुणे, ता. २६ : सराईत गुन्हेगार सूरज ठोंबरेने शक्तीप्रदर्शन करत एका संघटनेच्या कार्यक्रमाला हजेरी लावली. याची माहिती पोलिसांना मिळताच फिल्मी स्टाईलने पलायन करून पुन्हा रात्री पोलिसांसमोर शरणागती पत्करली. गुन्हे शाखेने ठोंबरेची फरासखाना पोलिस ठाण्यापर्यंत रस्त्यांवरून पायावर उड्या मारत नेवून चौकशी केली.
शक्तीप्रदर्शन प्रकरणात डेक्कन पोलिस ठाण्यात गुन्ह्याची नोंद केली असल्याची माहिती वरिष्ठ पोलिस अधिकाऱ्यांनी दिली. ठोंबरे व त्याच्यासोबत इतरांवर २०२१ मध्ये मकोका कारवाई झाली. त्यात तो कारागृहात होता. त्याला या गुन्ह्यात न्यायालयाने पुण्यात न येण्याच्या अटीवर जामीन दिलेला आहे. त्याने उच्च न्यायालयातून तीन दिवसांसाठी वडिलांच्या ऑपरेशनसाठी पुण्यात जाण्याची परवानगी मिळविली. त्यातून तो रविवारी पुण्यात आला. त्यानंतर तो एका संघटनेच्या कार्यक्रमात सहभागी झाला होता. रविवारी तो त्या संघटनेत जाहीर प्रवेश करणार होता. त्यानिमित्ताने अनेक तरुण आणि ठोंबरे एकत्रित आले आणि ते सर्व झेड ब्रीजजवळ जमले. या वेळी काही वर्षांपूर्वी तडीपार केलेले व इतर गुन्हेगार उपस्थित होते. ही माहिती समजताच पोलिस तेथे आले. तोपर्यंत ठोंबरे तेथून फरार झाला होता. रविवार रात्रीपासून पोलिसांची पथके त्याचा शोध घेत होते. शेवटी तो सोमवारी रात्री पुणे पोलिसांच्या गुन्हे शाखेकडे शरण आला.

वडिलांनाच माहिती नाही
ठोंबरे याने वडिलांच्या गुडघ्याचे ऑपरेशन आहे, असे सांगून तीन दिवसांसाठी पुण्यात येण्याची परवानगी न्यायालयातून मिळविली होती. पण, त्याच्या वडिलांनाच आपले ऑपरेशन आहे, याची कल्पना नव्हती, असे पोलिसांच्या तपासातून समोर आले आहे.