पुणे, ता. २७ : जिल्हा परिषद शाळेतील विद्यार्थ्यांची ‘नासा’ आणि ‘इस्रो’ला पाठविण्यात येणाऱ्या विद्यार्थ्यांची परीक्षेमार्फत निवड करण्यात आली. या परीक्षेसाठी आंतरविद्यापीठ खगोलशास्त्र व खगोलभौतिकशास्त्र केंद्राकडून (आयुका) तयार केलेली प्रश्नावली आता संच स्वरूपात जिल्हा परिषद शाळेतील विद्यार्थ्यांसाठी उपलब्ध होणार आहे, अशी माहिती जिल्हा परिषदेचे मुख्य कार्यकारी अधिकारी गजानन पाटील यांनी दिली.
ग्रामीण भागातील विद्यार्थ्यांमध्ये वैज्ञानिक दृष्टिकोन रुजविण्यासाठी सुरू केलेल्या उपक्रमाची कक्षा वाढविण्यासाठी आणखी एक पाऊल टाकण्यात आले आहे. यामध्ये प्रश्नसंच उपलब्ध करून देण्यासोबतच उपक्रमाची स्मरणिका तयार करण्याचा निर्णय प्रशासनाने घेतला आहे. ‘आयुका’कडून मुलाखतीद्वारे २३५ विद्यार्थ्यांमधून ७५ जणांची अंतिम निवड करण्यात आली. यापैकी २५ विद्यार्थ्यांची नासासाठी आणि ५० विद्यार्थ्यांची इस्रो भेटीसाठी निवड झाली आहे. या सर्व विद्यार्थ्यांचा दहा दिवसांचा दौरा निश्चित करण्यात आला आहे. नासासाठी निवड होणाऱ्या विद्यार्थ्यांचे पासपोर्ट आणि इतर आवश्यक कागदपत्रांची पूर्तता जिल्हा परिषदेने केली आहे. या संपूर्ण उपक्रमासाठी सुमारे अडीच कोटी रुपये खर्च अपेक्षित आहे. ग्रामीण भागातील विद्यार्थ्यांमध्ये अंतराळ विज्ञानाची गोडी निर्माण व्हावी, हा यामागील मुख्य उद्देश आहे.

‘नासा’ आणि ‘इस्रो’साठी ७५ विद्यार्थ्यांची निवड झाली आहे. त्याचबरोबर उर्वरित १६० विद्यार्थ्यांनाही देशातील नामांकित वैज्ञानिक संस्थांच्या भेटीसाठी नेण्याचे नियोजन आहे. यामध्ये ‘आयसर’सारख्या संस्थांचा समावेश आहे. एकही गुणवंत विद्यार्थी संधीपासून वंचित राहू नये, असा जिल्हा परिषदेचा प्रयत्न आहे. तसेच जिल्हा परिषद शाळेमध्ये या उपक्रमासाठीचा खास प्रश्नसंच प्रत्येक विद्यार्थ्यांना देण्यात येणार आहे.
- गजानन पाटील, मुख्य कार्यकारी अधिकारी