पुणे, ता.२८ ः गणेशोत्सवाच्या काळात वापर होत असलेल्या चिनी बनावटीच्या कृत्रिम फुलांवर बंदी घालावी, अशी मागणी कृषिमंत्री दत्तात्रेय भरणे यांनी पर्यावरणमंत्री पंकजा मुंडे यांच्याकडे पत्राद्वारे केली आहे. या फुलांवर बंदी घातल्यास शेतकऱ्यांकडील अस्सल फुलांना मागणी वाढण्यास मदत होईल. त्याचबरोबर फुलशेती आर्थिकदृष्ट्या सक्षम होईल, असे भरणे यांनी म्हटले आहे.
गणेशोत्सवामुळे सध्या फुलांची मागणी वाढली असून, रविवारी गौरींचे आगमन होत असल्याने सजावटीसाठी कृत्रिम फुले बाजारांत उपलब्ध झाली आहेत. या पार्श्वभूमीवर भरणे यांनी मुंडे यांना पत्र पाठवले आहे.
कृत्रिम फुलांच्या वापरामुळे फूलशेती धोक्यात आल्याने शेतकरी आर्थिक संकटात सापडला आहे. विविध धार्मिक, सामाजिक, राजकीय आणि सांस्कृतिक कार्यक्रमांमध्ये कृत्रिम फुलांचा वापर मोठ्या प्रमाणावर होत आहे. उत्सव काळात सार्वजनिक आणि घरगुती सजावटीसाठी शेतकऱ्यांनी शेतात पिकविलेल्या नैसर्गिक फुलांऐवजी चीनमधून आयात केलेल्या प्लॅस्टिक अथवा सिंथेटिक पदार्थांपासून तयार केलेली कृत्रिम फुले मोठ्या प्रमाणावर वापरली जात आहेत. हा वापर शेतकऱ्यांच्या आर्थिक उत्पन्नावर विपरीत परिणाम करणारा तर आहेच; परंतु, पर्यावरणालाही हानिकारक आहे. फुले दिसायला आकर्षक असली, तरी त्यांचा पर्यावरणावर आणि स्थानिक अर्थव्यवस्थेवर मोठा परिणाम होत आहे. आर्थिक संकटातून शेतकऱ्यांची सुटका करण्यासाठी कृत्रिम फुलांच्या वापरावर बंदी घालण्यात यावी, असे भरणे यांनी म्हटले आहे.
------