पुणे, ता. ३१ : ‘सोन्याच्या पावलांनी, गौराई आली’, असे म्हणत पारंपरिक पद्धतीने आणि प्रथेप्रमाणे रविवारी घरोघरी गौरींचे आगमन झाले. नव्या साड्या नेसलेल्या, अलंकार परिधान केलेल्या माहेरवाशिणी गौरींच्या आगमनाने चैतन्यमय वातावरण निर्माण झाले होते.
अनुराधा नक्षत्रावर गौरी आवाहनासाठी रविवारी सकाळपासून सायंकाळी ५ वाजून २७ मिनिटांपर्यंत मुहूर्त होता. त्यामुळे महिलांना आपल्या सोयीनुसार गौरींचे आवाहन आणि सजावट करण्यासाठी पुरेसा अवधी मिळाला होता. महालक्ष्मी असे संबोधल्या जाणाऱ्या गौरींच्या आगमनासाठी महिलांमध्ये उत्साह होता. ज्येष्ठा आणि कनिष्ठा गौरींसाठी विद्युत रोषणाई, फुलांच्या माळा आदींची सजावट करण्यात आली होती. तसेच, घरातील स्त्रियाही पारंपरिक पेहरावात सजल्या होत्या. बहुतांश घरांमध्ये दुपारनंतर तिन्हीसांजेपूर्वी गौरी आवाहन करण्यात आले.
‘सोन्याच्या पावलांनी, गौराई आली’, असे म्हणत माहेरवाशिणींचे वाजतगाजत स्वागत करण्यात आले. अनेक घरांमध्ये परंपरेप्रमाणे गौरींसाठी नव्या साड्यांची खरेदी करून त्या गौरींना नेसवण्यात आल्या होत्या. कुलाचारानुसार गौरीच्या पितळी तसेच शाडूच्या मुखवट्यांची पूजा करण्यात आली. काही घरांमध्ये खड्याच्या गौरींचे पूजन करण्यात आले. गौरी आगमनानंतर फराळाचे पदार्थ मांडून विद्युत रोषणाईने सजावट करण्यात आली होती.
गौरी आगमनानंतर महिलांची सोमवारी (ता. १) होणाऱ्या गौरी पूजनाच्या तयारीची लगबग सुरू झाली. हळदी-कुंकू समारंभातील खिरापत तयार करण्यापासून ते गौरी पूजनाच्या नैवेद्याच्या तयारीत महिला व्यग्र झाल्या होत्या. रविवारची सुट्टी असल्याने अनेक नागरिक गौरी आवाहनानंतर सायंकाळी सार्वजनिक गणेश मंडळांच्या गणरायाचे दर्शन घेण्यासाठी आणि देखावे पाहण्यासाठी बाहेर पडले.