पुणे, ता. ३ : रस्त्यावर लघुशंका केल्याचा जाब विचारल्याने टोळक्याने वाहनांची तोडफोड केली. सोमवारी रात्री साडेआठच्या सुमारास वडारवाडीत ही घटना घडली. याप्रकरणी चतु:शृंगी पोलिसांनी दोघांना अटक केली आहे.
विशाल पवार (वय २२) आणि अभिषेक संतोष माने (वय २४, दोघेही रा. वडारवाडी, शिवाजीनगर) अशी अटक केलेल्यांची नावे आहेत. याप्रकरणी साथीदार आशुतोष दत्तात्रेय लाटे व शंकर काळूराम विटकर (वय ४०, दोघे रा. वडारवाडी, शिवाजीनगर) यांच्याविरुद्ध गुन्हा दाखल केला आहे. महेश प्रमोद पवार (वय २९, रा. वडारवाडी, शिवाजीनगर) याने याबाबत चतु:शृंगी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी पवार, माने, लाटे, विटकर हे वडारवाडीतील परिसरात राहायला आहेत. या भागातील एका मंदिराच्या परिसरातील मोकळ्या जागेत एक सप्टेंबरला रात्री साडेआठच्या सुमारास आरोपीने लघुशंका केली. महेश पवार यांच्या आईने याबाबत आरोपींना जाब विचारला. यावरून आरोपींनी तक्रारदार पवार यांच्या आईला शिवीगाळ केली. काही वेळानंतर आरोपींनी पवार यांच्या मोटारीसह परिसरात लावलेल्या वाहनांची दांडक्याने तोडफोड करून दहशत माजविली. पवार आणि त्यांच्या भावाला मारहाण करून शिवीगाळ केली, तसेच ‘जेलमधून सुटून आल्यानंतर जिवे मारतो’, अशी धमकी देऊन आरोपी फरारी झाले. या घटनेची माहिती मिळताच वरिष्ठ पोलिस निरीक्षक उत्तम भजनावळे यांनी घटनास्थळी भेट दिली. आरोपी पवार आणि माने यांना अटक केली.