पुणे, ता. ९ : रोटरी क्लब ऑफ कात्रज आणि रोटरी इंटरनॅशनल डिस्ट्रिक्ट ३१३१तर्फे ‘रोटरी आर्ट एक्झिबिशन’चे रविवारी (ता. १४) व सोमवारी (ता. १५) आयोजन केले आहे. हे प्रदर्शन जंगली महाराज रस्त्यावरील बालगंधर्व कलादालन येथे सकाळी १० ते रात्री ८ या वेळेत होणार आहे. या चित्रांच्या विक्रीतून जमा होणारा निधी रोटरी क्लबच्या सामाजिक प्रकल्पांसाठी वापरला जाणार असल्याची माहिती क्लबचे अध्यक्ष डॉ. अजय काळे यांनी आज पत्रकार परिषदेत दिली. हे प्रदर्शन सर्वांसाठी खुले आहे.
या प्रदर्शनात जलरंगचित्रकार मिलिंद मुळीक यांची कलाकृती, दिलीप पंडित यांची वन्यजीव छायाचित्रे, तसेच अंजली हुगे यांची ऐतिहासिक तैलचित्रे ठेवण्यात आली आहेत. मुळीक यांनी जगभरात एकल प्रदर्शने भरवली असून, त्यांच्या ‘जलरंग’ पुस्तकाला मोठी लोकप्रियता मिळाली आहे. पंडित यांची आफ्रिका व भारतातील जंगलांमधील छायाचित्रे प्रदर्शनात आकर्षण ठरणार आहेत. तर हुगे यांनी राजमाता जिजाबाई, कृष्णदेवराय यांच्यासह ऐतिहासिक मालिकांवर चित्रण केले असून सध्या त्या आदि शंकराचार्य मालिकेवर कार्यरत आहेत.