पुणे, ता. ९ : पद्मावती-तळजाई परिसरात दहशत माजविणाऱ्या आणि गंभीर गुन्ह्यांतील सराईत गुन्हेगार साहिल गणेश वायदंडे (वय २५) याला पोलिसांनी अटक केली. त्याला ‘एमपीडीए’अंतर्गत एक वर्षासाठी वर्धा कारागृहात स्थानबद्ध करण्याचा आदेश पोलिस आयुक्त अमितेश कुमार यांनी दिला.
साहिल वायदंडे याच्याविरुद्ध पाच गंभीर गुन्हे दाखल आहेत. सहकारनगर पोलिसांनी त्याच्यावर ‘एमपीडीए’अंतर्गत कारवाईचा प्रस्ताव तयार केला. त्यावर १२ ऑगस्टला पोलिस आयुक्तांनी स्थानबद्धतेचा आदेश दिला. मात्र, त्यानंतर तो फरार झाला होता. स्वारगेट येथे तो मित्राला भेटण्यासाठी येणार असल्याची माहिती पोलिस अंमलदार अमोल पवार यांना मिळाली. त्यानुसार पोलिसांनी सापळा रचून त्याला ताब्यात घेतले.

अतिरिक्त पोलिस आयुक्त राजेश बनसोडे, पोलिस उपायुक्त मिलिंद मोहिते, साहाय्यक आयुक्त राहुल आवारे यांच्या मार्गदर्शनाखाली वरिष्ठ पोलिस निरीक्षक विठ्ठल पवार, पोलिस निरीक्षक (गुन्हे) सुरेखा चव्हाण, साहाय्यक निरीक्षक सद्दाम हुसेन फकीर, फिरोज शेख, साहाय्यक उपनिरीक्षक बापू खुटवड, पोलिस अंमलदार अमोल पवार, गोरख ढगे, हरिश्चंद्र चोरमले, मारोती नलवाड, किरण कांबळे, विनायक एडके, सागर सुतकर, अमित पदमाळे आणि महेश भगत यांनी ही कारवाई केली.