पुणे, ता. ९ : शहरात मागील ४८ तासांत हवामान कोरडे राहून कमाल तापमानात वाढ झाली आहे. तर, पुढील दोन दिवस जोरदार पावसाची शक्यता कमी असून, अति हलक्या पावसाच्या सरी पडण्याचा अंदाज पुणे वेधशाळेने वर्तविला आहे.
पुण्यात रविवारी सकाळी पुन्हा पावसाने हजेरी लावली होती. दुपारनंतर जोर कमी झाला. दुसऱ्या दिवशी पावसाने उघडीप दिली. मंगळवारी आकाश निरभ्र, ऊन आणि हवामान कोरडे होते. त्यामुळे शहर आणि उपनगरांत पावसाची नोंद झालेली नाही. पुढील दोन दिवस शहरात पावसाची शक्यता नसून, जिल्ह्यात अति हलका आणि घाट माथ्यावर हलक्या ते मध्यम स्वरूपाचा पडण्याची शक्यता पुणे वेधशाळेने वर्तविली आहे. गेल्या २४ तासांत ताम्हिणी घाटमाथ्यावर हलक्या सरी पडल्या. याठिकाणी २० मिलिमीटर आणि लोणावळा परिसरात ६ मिलिमीटर पावसाची नोंद झाली. पुढील दोन दिवस घाटमाथ्यावर हलक्या ते मध्यम सरी पडण्याचा अंदाज भारतीय हवामानशास्त्र विभागाने वर्तवला आहे.