पुणे, ता. १० : विसर्जन सोहळ्यात गर्दीत ट्रॅक्टर ट्रॉलीच्या चाकाखाली चिरडल्याने १४ वर्षीय मुलगा गंभीर जखमी झाला. ही घटना शिवाजीनगर परिसरातील श्री ज्ञानेश्वर पादुका चौक परिसरात रविवारी (ता. ७) दुपारी घडली. अपघातानंतर ट्रॅक्टर चालक जखमी मुलाला रुग्णालयात न नेता पसार झाला.
दीपक गोरक्ष नेटके (वय १४) असे गंभीर जखमी झालेल्या मुलाचे नाव आहे. याप्रकरणी पोलिस हवालदार संदीप शिंदे यांनी फिर्याद दिली आहे. त्यानुसार ट्रॅक्टर चालक अमोल भीमराव मोहिते (वय ४१, रा. गोकळी, ता. फलटण) याच्यासह दोघांवर मंगळवारी गुन्हा दाखल करण्यात आला आहे. पोलिसांनी दिलेल्या माहितीनुसार, रविवारी दुपारी विसर्जन सोहळ्यात ट्रॅक्टर चालकाने देखावा लावलेल्या ट्रॉलीसह ज्ञानेश्वर पादुका चौकातून मॉडर्न महाविद्यालयाच्या दिशेने वळण घेतले. त्या वेळी ट्रॉलीने धडक दिल्याने दीपक दुर्दैवाने मागील चाकाखाली सापडला. अपघातानंतर मदत न करता चालकाने पळ काढला.