पुणे, ता. ९ : घोरपडी परिसरातील बी. टी. कवडे रस्त्यावरील एका बंगल्यात शॉर्टसर्किटमुळे आग लागल्याची घटना मंगळवारी मध्यरात्री घडली. बंगल्यात अडकलेल्या आठ जणांची सुखरूप सुटका करण्यासाठी अग्निशामक दलाच्या जवानांना खिडक्यांचे गज तोडावे लागले. अखेर जवानांनी प्रयत्न करून सर्वांना सुखरूप बाहेर काढले.
अग्निशामक दलाकडून मिळालेल्या माहितीनुसार, मंगळवारी मध्यरात्री उदयबाग परिसरातील पृथ्वी गार्डन सोसायटीतील एका बंगल्यात शयनगृहातून अचानक धुराचे लोट बाहेर येऊ लागले. स्थानिकांनी ही बाब तत्काळ अग्निशामक दलाला कळवली. घटनेची माहिती मिळताच अधिकारी नीलेश लोणकर, जवान सुभाष खाडे, श्रेयस मोटे, महेश पांडे, बापू राऊत आणि अडागळे घटनास्थळी दाखल झाले. बंगल्यात अडकलेले आठ जण धुरामुळे घाबरून गेले होते. जवानांनी खिडक्यांचे गज तोडून पाण्याचा मारा करत आग आटोक्यात आणली. शॉर्टसर्किटमुळे आग लागल्याची प्राथमिक शक्यता अधिकाऱ्यांनी व्यक्त केली आहे.