पुणे, ता. १२ : नदीपात्रात ठिकठिकाणी अतिक्रमणे झाली आहेत, मात्र महापालिकेकडून त्यावर ठोस कारवाई होत नसल्याची सद्यःस्थिती असून महापालिका याकडे दुर्लक्ष करत असल्याचा आरोप नागरिक करत आहेत. याबाबत ‘‘संबंधित नागरिकांना नोटीस बजावली असून खुलासा प्राप्त झाल्यानंतर पुढील कारवाई केली जाईल,’’ असे महापालिकेच्या अधिकाऱ्यांनी सांगितले.
नारायण पेठेतून डेक्कनकडे जाणाऱ्या रस्त्यावर भिडे पुलाजवळील जागेलगत असलेल्या महापालिकेच्या सीमाभिंतीपलीकडे खासगी मिळकती व जुने वाडे आहेत. या सीमाभिंतीलगतच मुठा नदीपात्रात अनधिकृत बांधकाम करण्यात आले आहे. संबंधित बांधकामाबाबत स्थानिक नागरिकांकडून महापालिका प्रशासनाकडे सातत्याने तक्रारी केल्या जातात, मात्र त्यावर तात्पुरती कारवाई केली जाते. नदीपात्रातील राडारोडाही काढला जात नाही. कारवाईनंतर काही दिवसांतच परिस्थिती पुन्हा ‘जैसे थे’ होते. महापालिकेने अनधिकृत बांधकामाबाबत संबंधित व्यक्तींना नुकतीच नोटीस बजावली आहे, मात्र प्रत्यक्षात ठोस कारवाई केली नाही, असा आरोप रहिवाशांकडून केला जात आहे.
तसेच गणेशोत्सवाच्या धामधुमीत पुन्हा एकदा नदीपात्रात रातोरात निळ्या पत्र्याचे शेड करून, संबंधित जागेवर कब्जा केल्यानंतरही महापालिका प्रशासन त्याकडे दुर्लक्ष करत असल्याचाही आरोप नागरिक करत आहेत.